Skill Scam : స్కిల్ డెవలప్మెంట్ కార్పొరేషన్ పేరుతో చంద్రబాబు హయాంలో పెద్ద కుంభకోణం జరిగిందని ప్రస్తుత వైఎస్ జగన్ సర్కార్ అంటోంది. ఈ మేరకు ఏపీ సీఐడీ కేసు నమోదు చేసింది, విచారణ జోరుగా సాగుతోంది. మాజీ ఐఏఎస్ అధికారి లక్ష్మినారాయణను విచారించారు, ఈ క్రమంలో లక్ష్మినారాయణ అనారోగ్యానికి గురైతే, ఆయన్ని ఆసుపత్రికి తరలించారు.
కుంభకోణం సుష్పష్టం.. అని అధికార వైసీపీ కుండబద్దలుగొట్టేస్తోంది. అసలు కుంభకోణమే జరగలేదని ప్రతిపక్షం తెలుగుదేశం పార్టీ అంటోంది. నారా లోకేష్, చంద్రబాబు ఈ కుంభకోణం నుంచి తప్పించుకునే ప్రసక్తే లేదని వైసీపీ గట్టిగా చెబుతున్నా, అదెంత నిజం.? అన్న అనుమానాలైతే అందరికీ కలుగుతున్నాయి. దానికి బలమైన కారణం కూడా లేకపోలేదు. అమరావతి కుంభకోణం, ఈఎస్ఐ మెడికల్ స్కామ్, వీటితోపాటుగా ఫైబర్ నెట్ స్కామ్.. ఇవన్నీ ఇటీవలి కాలంలో వెలుగు చూసినవే.
ప్రతిసారీ హైప్ విపరీతంగా వుంటోంది ఆయా కేసుల విషయంలో. ఆ తర్వాత వ్యవహారం చప్పబడిపోతోంది. ఏమన్నా అంటే, చంద్రబాబు అండ్ టీమ్.. వ్యవస్థల్ని మేనేజ్ చేసి తప్పించుకుంటోందంటూ అధికార వైసీపీ చేతులు దులిపేసుకుంటుండడం గమనార్హం.
ఇలాంటి వ్యవహారాలు ప్రజల్లోకి తప్పుడు సంకేతాలు పంపుతాయి. ఆయా కుంభకోణాలపై జరుగుతున్న ప్రచారానికి, జరుగుతున్న విచారణలకీ పొంతన వుండటంలేదు. హైడ్రామా నడుస్తోంది అరెస్టుల పర్వంలో. ఆ తర్వాత అంతా కామప్. మరి, స్కిల్ డెవలప్మెంట్ స్కామ్ విషయంలో ఏం జరుగుతుంది.? వేచి చూడాల్సిందే.