కరోనా లాక్ డౌన్ తర్వాత థియేటర్లు పున:ప్రారంభం అయినప్పటికీ సినీ పరిశ్రమల్లో అంతగా సందడి కనిపించడం లేదు. థియేటర్లలో సందడి అంతంతమాత్రమే కనిపించింది. కానీ తెలుగు రాష్ట్రాల్లో మాత్రం సంక్రాంతి వేళ థియేటర్లు కళకళలాడుతున్నాయి. ఒకటికి నాలుగు సినిమాలు పండుగ నాడు అందరిని పలకరించాయి. పండుగ తర్వాత కూడా వీటి సందడి కొనసాగుతున్నాయి. వచ్చే రెండు మూడు వారాల్లోనూ సినిమాలు వరుస కట్టనున్నాయి.
సినిమా ఇండస్ట్రీకి అన్ సీజన్ గా భావించే ఫిబ్రవరిలోనూ పెద్ద ఎత్తునే సినిమాలు రేసులోకి దిగుతున్నాయి. రాబోయేవి చిన్న సినిమాలే అయినప్పటికీ సందడేమీ తక్కువగా ఉండబోదు.వచ్చే వారాంతంలో అల్లరి నరేష్ సినిమా ‘బంగారు బుల్లోడు’ ప్రేక్షకుల ముందుకు రానుంది. 23న ఈ చిత్రం విడుదలవుతుంది. ముందు రోజు ‘ఆహా’ ద్వారా ‘సూపర్ ఓవర్’ రిలీజ్ కానుంది. ఇక నెలాఖర్లో రెండు కొత్త చిత్రాలు ప్రేక్షకుల్ని పలకరించనున్నాయి. 29న యాంకర్ ప్రదీప్ మాచిరాజు హీరోగా పరిచయం అవుతున్న ’30 రోజుల్లో ప్రేమించడం ఎలా’ విడుదల కానుంది.
అదే రోజు సుమంత్ థ్రిల్లర్ మూవీ ‘కపటదారి’ కూడా ప్రేక్షకుల ముందుకు రానుంది. తర్వాతి వారం మోస్ట్ అవైటెడ్ మూవీ ‘ఉప్పెన’ రిలీజ్ కానుంది. అదే రోజు తెలుగులో తొలి జాంబీ మూవీ ‘జాంబీరెడ్డి’ థియేటర్లలోకి దిగుతుంది. ఇక వేలంటైన్స్ డే వీకెండ్లో ఒకేసారి మూడు చిత్రాలు రేసులో నిలవబోతున్నాయి. ఇప్పటికే ఆ రోజున సందీప్ కిషన్ మూవీ ‘ఎ1 ఎక్స్‌ప్రెస్’, ఆది సాయికుమార్ చిత్రం ‘శశి’ రిలీజ్ డేట్ ఫిక్స్ చేసుకోగా.. కొత్తగా జగపతిబాబు సినిమా ‘ఎఫ్‌సీయూకే’ 12కే రిలీజ్ ఖరారు చేసుకుంది. మరోవైపు రిపబ్లిక్ డే కానుకగా నాగార్జున సినిమా ‘వైల్డ్ డాగ్’ నెట్‌ఫ్లిక్స్‌లో రిలీజవుతుందని అంటున్నారు కానీ.. ఇంకా అధికారిక ప్రకటనేమీ రాలేదు. మొత్తంగా రాబోయే నెల రోజుల్లో రెండంకెల సంఖ్యలో కొత్త సినిమాలు ప్రేక్షకులను పలకరించబోతున్నాయన్నమాట.