అమెరికా అధ్యక్షుడు డొనాల్డ్ ట్రంప్ ప్రతిపాదించిన గాజా శాంతి ప్రణాళికకు భారత్ ప్రధాని నరేంద్ర మోదీ మద్దతు తెలిపారు. గాజా సమస్యకు దీర్ఘకాలిక, నిర్మాణాత్మక పరిష్కారం అందించే ప్రయత్నంలో ఇది ఒక ముఖ్యమైన అడుగు అని ఆయన పేర్కొన్నారు. ట్రంప్ ప్రణాళిక ప్రకారం గాజా, ఇజ్రాయెల్ మరియు పాలస్తీనియన్ల మధ్య శాంతి, భద్రత మరియు ప్రాంతీయ అభివృద్ధి కోసం 20 ముఖ్యమైన అంశాలను అమలు చేయవలసి ఉంటుంది.
సెప్టెంబర్ 29న ట్రంప్, ఇజ్రాయెల్ ప్రధాని బెంజమిన్ నెతన్యాహు ప్రణాళికను ప్రజలకు ప్రకటించారు. ఇందులో గాజాను తీవ్రవాద రహిత ప్రాంతంగా మలచడం, పునరాభివృద్ధి చేయడం, తాత్కాలిక పాలక బోర్డు ఏర్పాటు చేయడం వంటి కీలక అంశాలు ఉన్నాయి. ఈ బోర్డుకు ట్రంప్ అధ్యక్షత వహించనున్నారు, బ్రిటిష్ మాజీ ప్రధాని టోనీ బ్లెయిర్ సహా పలువురు అంతర్జాతీయ ప్రతినిధులు సభ్యులుగా ఉంటారు.
ప్రణాళిక అమలు అయితే, రెండు పక్షాలు అంగీకరించిన వెంటనే యుద్ధం నిలిపివేయబడుతుంది. ఇజ్రాయెల్ దళాలు నిర్ణీత రేఖలకు వెనక్కి వెళ్తాయి, వైమానిక దాడులు, ఫిరంగి దాడులు తాత్కాలికంగా నిలుస్తాయి. ముఖ్యంగా బందీల విడుదలపై ప్రత్యేక శ్రద్ధ చూపుతారు. ఇజ్రాయెల్ ఒప్పందాన్ని అంగీకరించిన 72 గంటల్లోపే అన్ని బందీలను తిరిగి ఇవ్వాల్సి ఉంటుంది. అంతేకాక, ఇజ్రాయెల్ 250 మంది జీవిత ఖైదీలను, 1700 మంది గాజా వాసులను (అక్టోబర్ 7, 2023 తరువాత నిర్బంధిత) విడుదల చేస్తుంది. వీటిలో ఎక్కువగా మహిళలు, పిల్లలు ఉంటారు. అదేవిధంగా ప్రతి ఇజ్రాయెల్ బందీ అవశేషాలకు ప్రతిగా 15 మంది గాజా వాసుల మృతదేహాలను విడుదల చేస్తారు.
ఈ ప్రణాళిక అమలు అయితే గాజాలో శాంతి స్థిరపడే అవకాశాలు పెరుగుతాయి. రెండు జాతుల మధ్య శత్రుత్వం కొంతమేర తగ్గుతుంది. అలాగే ప్రాంతీయ అభివృద్ధి, భద్రతకు కొత్త అవకాశాలు వస్తాయి. అంతర్జాతీయ వేదికపై కూడా ఇది శాంతి చర్చలకు కొత్త మలుపు కావచ్చని నిపుణులు భావిస్తున్నారు. భారత ప్రధాని మోదీ మాట్లాడుతూ.. మొత్తం పశ్చిమాసియా ప్రాంతానికి దీర్ఘకాలిక శాంతి, భద్రత, అభివృద్ధి తీసుకువచ్చే నిర్మాణాత్మక ప్రయత్నం ఇది. అన్ని పక్షాలు కలసి ఈ ప్రణాళికకు మద్దతు ఇవ్వాలి అని అభిప్రాయపడ్డారు.
విశ్లేషకుల అభిప్రాయంలో, ఈ ప్రణాళికకు మోదీ మద్దతు వ్యక్తం చేయడం అంతర్జాతీయ స్థాయిలో గాజా సమస్యకు దృష్టి పెట్టే భారతదేశ సానుకూలంగా సూచిస్తుంది. భవిష్యత్తులో ఇలాంటి నిర్మాణాత్మక ప్రయత్నాలు పశ్చిమాసియా ప్రాంతంలోని శాంతి, భద్రత, ప్రజా సంక్షేమానికి కీలకంగా మారవచ్చని భావిస్తున్నారు.