టీడీపీ అధినేత నారా చంద్రబాబునాయుడికి కొత్త కష్టమొచ్చింది. కొద్ది రోజుల క్రితం చంద్రబాబు సొంత జిల్లా చిత్తూరులో యంగ్ టైగర్ ఎన్టీయార్ అభిమానులైన టీడీపీ కార్యకర్తలు తమ ఇల్ళ మీద జూనియర్ ఎన్టీయార్ అలాగే హరికృష్ణ ఫొటోలతో కూడిన జెండాల్నిపెట్టుకోవడం టీడీపీ వర్గాల్లో కలకలం రేపిన విషయం విదితమే. టీడీపీ జెండా అయిన పసుపు జెండా కాకుండా, తెల్ల జెండాలు దర్శనమిచ్చాయి. మళ్ళీ అదే సీన్, కృష్ణా జిల్లాలో చంద్రబాబుకి రిపీట్ అవుతోంది.
కృష్ణా జిల్లాలో పార్టీకి చెందిన ముఖ్య నేతల్ని పరామర్శించేందుకు వెళ్ళిన చంద్రబాబుకి టీడీపీ జెండాలతోపాటు ఈ తెల్ల జెండాలు.. అవేనండీ యంగ్ టైగర్ ఎన్టీయార్ జెండాలు కూడా స్వాగతం పలికాయి. ‘కాబోయే సీఎం యంగ్ టైగర్ ఎన్టీయార్..’ అనే నినాదాలు వాటిపై రాసి వున్నాయి.. యంగ్ టైగర్ ఫొటోలతో సహా. కొన్ని జెండాలైతే, జై ఎన్టీయార్.. జై టీడీపీ.. అంటూ యంగ్ టైగర్ ఫొటోలను కలిగి వుండడం గమనార్హం.
ఈ జెండాల్ని ఎవరెవరు తెస్తున్నారు.? అన్నదానిపై పార్టీ శ్రేణులు స్పెషల్ ఫోకస్ పెట్టినట్లు తెలుస్తోంది. మరోపక్క, యంగ్ టైగర్ ఎన్టీయార్ మాత్రం రాజకీయాల పట్ల అంత ఆసక్తి చూపించడంలేదు. సినిమాలతోపాటుగా, బుల్లితెరపై ఓ గేమ్ షోతో బిజీగా వున్నాడిప్పుడు యంగ్ టైగర్. అలాగని, రాజకీయాలపై పూర్తిగా ఆసక్తి లేదా.? అంటే, వుండే వుంటుంది.. కానీ, అందుకు ఇది తగిన సమయం కాదని అనుకుంటున్నాడాయన.
అయితే, నిప్పు లేకుండా పొగ రాదు కదా.? యంగ్ టైగర్ ఎన్టీయార్ అనుమతి లేకుండానే ఆయన జెండాలు, చంద్రబాబు పర్యటనల్లో హల్ చల్ చేస్తున్నాయని అనుకోగలమా.? ఏమోగానీ, చంద్రబాబుకి ముందు ముందు యంగ్ టైగర్ ఎన్టీయార్ ఎఫెక్ట్ గట్టిగానే తగిలిలేలా వుందన్నది మాత్రం నిర్వివాదాంశం. వీలైనంత త్వరగా ఈ విషయమై యంగ్ టైగర్ ఎన్టీయార్‌తో చంద్రబాబు చర్చించి, యంగ్ టైగర్ అభిమానుల్ని శాంతింపజేసే చర్యలు చేపట్టకపోతే అంతే సంగతులు.