Jana Sena Party! : ఎవరికి వారికి సొంత ఆత్మగౌరవం వుండి తీరుతుంది. ఆత్మగౌరవం లేని మనిషి అంటూ ఎవరైనా వుంటారా.? ఆయా పరిస్థితుల ప్రభావంతో, ఒక్కోసారి తమదైన వ్యూహాలతో పంథా మార్చుకుంటారు. ఇంతకీ, ఇప్పడిదంతా ఎందుకంటారా.? జనసేన పార్టీ ముఖ్య నేత నాదెండ్ల మనోహర్, వైసీపీలో ఆత్మగౌరవం వున్నవాళ్ళంతా ఆ పార్టీని వీడి, జనసేనలోకి రావాలంటూ చిత్రమైన రీతిలో పిలుపునిచ్చారు.
‘భీమ్లానాక్’ సినిమాపై వైఎస్ జగన్ సర్కారు పెత్తనం చేద్దామనుకుందనీ, అణగదొక్కాలనుకుందనీ, అయితే ఆత్మగౌరవమే ఇక్కడ విజయం సాధించిందనీ, అహంకారం ఓడిపోయిందనీ నాదెండ్ల మనోహర్ చెప్పారు. మలయాళ సినిమా ‘అయ్యప్పనుమ్ కోషియమ్’ తెలుగులోకి ‘భీమ్లానాయక్’గా రీమేక్ అయిన విషయం విదితమే.
పవన్ కళ్యాణ్ నటించిన ‘భీమ్లానాయక్’ సినిమా సంచలన విజయాన్ని అందుకుంది. ఈ సినిమాలోని కాన్సెప్ట్ కూడా.. అహంకారానికీ, ఆత్మగౌరవానికీ మధ్య జరిగే పోరాటం. సినిమా కాబట్టి, ఆత్మగౌరవమే గెలుస్తుంది. నిజ జీవితంలో అలా జరుగుతుందా.? ఛాన్సే లేదు.
ఆత్మగౌరవం కాస్సేపు పక్కన పెట్టబట్టే కదా పవన్ కళ్యాణ్ గతంలో బీజేపీకి, టీడీపీకి మద్దతిచ్చి.. ఆ తర్వాత వామపక్షాలు, బీఎస్పీతో చేతులు కలిపింది.? ఆ ఆత్మగౌరవాన్ని పక్కన పెట్టే కదా.. గతంలో గులాబీ పార్టీని విమర్శించి, ఇప్పుడు అదే పార్టీ వర్కింగ్ ప్రెసిడెంట్ కేటీయార్ని తన సినిమా ‘భీమ్లానాయక్’ ప్రీ రిలీజ్ ఫంక్షన్ కోసం పిలిచింది.?
రాజకీయం వేరు, సినిమా వేరు. ఈ విషయాన్ని పవన్ కళ్యాణ్ స్వయంగా, చాలా స్పష్టంగా చెప్పారు ‘భీమ్లానాయక్’ సినిమా ప్రీ రిలీజ్ వేడుకలో. అది నాదెండ్ల మనోహర్కే అర్థం కాకపోతే ఎలా.?