ప్రముఖ విలక్షణ నటులు ప్రకాష్ రాజ్ నిన్న ఒక మీడియా సంస్థతో మాట్లాడుతూ జనసేన అధినేత పవన్ కళ్యాణ్ గురించి వివాదాస్పద వ్యాఖ్యలు చేశాడు , ప్రకాష్ రాజ్ చేసిన వ్యాఖ్యలపై తెలుగు రాష్ట్రాల్లోని పవన్ ఫాన్స్ అగ్గిమీద గుగ్గిలం అవుతున్నారు.
“పవన్ కు ఏమైందో నాకు అర్థం కావడం లేదు. పవన్ విషయంలో చాలా నిరాశచెందాను. ఆయన ఓ లీడర్, ఆయనకు ఓ పార్టీ ఉంది. మరో నాయకుడి భుజం ఎందుకు ఎక్కారు? 2014లో బీజేపీని సపోర్ట్ చేశారు. గత ఎన్నికల్లో బీజేపీని ద్రోహి అన్నారు. ఇప్పుడు మళ్లీ వాళ్లే ఆయనకు మహా నాయకులుగా కనిపిస్తున్నారు. 3-4 సార్లు మాట మార్చారు. అంటే పవన్ ఊసరవెల్లి అయి ఉండాలి.” జాతి హితం కోసం బీజేపీకి మద్దతిస్తున్నారని పవన్ చెబితే జనాలు నమ్మరంటున్నారు ప్రకాష్ రాజ్. గ్రేటర్ ఎన్నికల్లో బీజేపీ నాయకుల మాటలు జాతి హితానికి తగ్గట్టు ఉన్నాయా అని ప్రశ్నించారు.
“తెలంగాణ ప్రజలు జాగ్రత్తగా ఉండండి. గత ఎన్నికల్లో అట్నుంచి ఇటు వచ్చిన వాళ్లకు కేసీఆర్ రిటర్న్ గిఫ్ట్ ఇచ్చారు. ఈసారి ఆయన చాలా పనుల్లో ఉన్నారు. కాబట్టి ప్రజలే బీజేపీకి రిటర్న్ గిఫ్ట్ ఇచ్చే బాధ్యత తీసుకోవాలి. వీళ్ల వెనక వెళ్లిన మన వాళ్లకు కూడా ఓసారి గుణపాఠం నేర్పాలి.” అంటూ ప్రకాష్ రాజ్ మాట్లాడటం జరిగింది. దీనితో జనసైనికులు సోషల్ మీడియా వేదికగా ప్రకాష్ రాజ్ మీద విమర్శలు చేస్తూ, దారుణంగా ట్రోల్ల్స్ చేస్తున్నారు, ఇదే సమయంలో కొందరు పవన్ కళ్యాణ్ ఫ్యాన్స్ ఏకంగా ప్రకాష్ రాజ్ ఇంటి ముందు ధర్నా చేయాలనే ఆలోచనలో ఉన్నట్లు తెలుస్తుంది.
మరోపక్క పవన్ కళ్యాణ్ సోదరుడు నాగబాబు కూడా ప్రకాష్ రాజ్ మీద విరుసుకుపడుతూ “ఈ దేశానికి బీజేపీ, ఏపీకి జనసేన పార్టీతోనే అభివృద్ధి సాధ్యం. నీలాంటి కుహనా మేధావులు ఎన్ని వాగినా బీజేపీ, జనసేన కూటమి శక్తిని ఆపలేరు. నిర్మాతలని డబ్బు కోసం ఎన్ని రకాలుగా హింస పెట్టావో, డేట్స్‌ ఇచ్చి రద్దు చేసి ఎంత హింసకు గురిచేశావో అన్నీ గుర్తున్నాయి. ముందు నువ్వు మంచి మనిషిగా మారు. ఆ తర్వాత మాట్లాడు. డైరెక్టర్స్‌ని కాకా పట్టి నిర్మాతలను కాల్చుకు తినే నీకు ఇంత కంటే మంచిగా మాట్లాడడం ఏమి తెలుసు” అంటూ సోషల్ మీడియా లో ఒక సుదీర్ఘమైన పోస్ట్ పెట్టాడు..