భారత్‌, పాకిస్తాన్‌ల మధ్య ఉద్రిక్త పరిస్థితులు కొనసాగుతున్న వేళ, టీవీ ఛానెల్లు ‘ఆపరేషన్ సిందూర్’ను విస్తృతంగా కవర్ చేస్తుండటమే కాదు, సైరన్‌లు, అలారం శబ్దాలను కూడా తరచుగా ప్రసారం చేస్తున్నాయి. అయితే ఈ విధానం పౌరుల్లో గందరగోళానికి కారణమవుతుందన్న ఆందోళనతో కేంద్ర ప్రభుత్వం చిత్తశుద్ధిగా స్పందించింది.
కేంద్ర హోంశాఖకు అనుబంధంగా పనిచేస్తున్న డైరెక్టరేట్ జనరల్ ఆఫ్ ఫైర్ సర్వీసెస్, సివిల్ డిఫెన్స్, హోం గార్డ్స్ విభాగాలు ప్రత్యేకంగా మీడియా సంస్థలకు ఒక అడ్వైజరీ జారీ చేశాయి. ఇందులో, సైరన్‌లను కేవలం మాక్ డ్రిల్‌లు, అవగాహన కార్యక్రమాల సమయంలో మాత్రమే వినియోగించాలన్న సూచనలు ఉన్నాయి. అర్థం లేకుండా వాటిని వార్తా ప్రసారాల్లో వాడడం వల్ల ప్రజల్లో తప్పుడు సంకేతాలు వెళ్తాయని హెచ్చరించింది.
సాధారణంగా సైరన్ లేదా అలారం శబ్దాలు ఒక అత్యవసర పరిస్థితి సంకేతంగా పరిగణించబడతాయి. వాటిని తరచుగా వినడం వల్ల ప్రజలు నిజమైన అత్యవసర పరిస్థితుల్లో అలర్ట్ కాకుండా, తేలికగా తీసుకునే అవకాశం ఉందని అధికారులు చెప్పుకొచ్చారు. అందువల్ల మీడియా వర్గాలు బాధ్యతగా వ్యవహరించాలని కేంద్రం స్పష్టం చేసింది.
ప్రస్తుతం మీడియా ఛానెల్లపై ప్రజలు పెద్ద స్థాయిలో దృష్టి పెట్టడంతో, ప్రసారాలు ఎంత సమతూకంగా, నిజాయితీగా ఉండాలి అన్నది మరింత కీలకమైంది. కేవలం రేటింగ్స్ కోసమే కాకుండా, సమాజం వద్దకు నిజమైన సమాచారం చేరవేయడమే వారి ప్రథమ బాధ్యత అని కేంద్రం గుర్తు చేసింది. చివరగా, అలర్ట్ ఇవ్వడం తప్పు కాదు కానీ, అవసరం లేని పానిక్ పరిస్థితి సృష్టించడం మాత్రం ఎప్పటికీ క్షమించరాని తప్పుగా మారుతుందని అధికారులు స్పష్టం చేశారు.
