భారత్-పాకిస్థాన్ మధ్య ఉద్రిక్త పరిస్థితులు రోజురోజుకీ పెరుగుతున్న నేపథ్యంలో, భారత క్రికెట్ నియంత్రణ మండలి (బీసీసీఐ) సంచలన నిర్ణయం తీసుకుంది. ప్రస్తుత సీజన్‌లోని అన్ని ఐపీఎల్ మ్యాచ్‌లను వారం రోజుల పాటు వాయిదా వేస్తున్నట్లు అధికారికంగా ప్రకటించింది. ఆటగాళ్లు, సిబ్బంది, ప్రేక్షకుల భద్రతకే ప్రాధాన్యత ఇస్తూ ఈ నిర్ణయం తీసుకోవాల్సి వచ్చిందని బోర్డు వర్గాలు స్పష్టం చేశాయి.
ఇప్పటికే మే 8న ధర్మశాలలో పంజాబ్ కింగ్స్, ఢిల్లీ క్యాపిటల్స్ మధ్య జరుగుతున్న మ్యాచ్ మధ్యలోనే నిలిపివేయాల్సి వచ్చింది. సరిహద్దు పరిస్థితులు మరింత ఉద్రిక్తతకు దారి తీస్తుండటంతో బీసీసీఐ ఈ నిర్ణయాన్ని తక్షణమే అమల్లోకి తీసుకువచ్చింది. నేటి నుంచి జరగాల్సిన అన్ని మ్యాచ్‌లు నిలిచిపోవడంతో క్రికెట్ అభిమానుల్లో నిరాశ చోటు చేసుకుంది.
ముందుగా షెడ్యూల్ ప్రకారం, మే 10న హైదరాబాద్ ఉప్పల్ స్టేడియంలో సన్‌రైజర్స్ హైదరాబాద్, కోల్‌కతా నైట్ రైడర్స్ మధ్య కీలక మ్యాచ్ జరగాల్సి ఉండగా, ఇది కూడా వాయిదా పడింది. ఈ నేపథ్యంలో సన్‌రైజర్స్ హైదరాబాద్ యాజమాన్యం ఇప్పటికే టికెట్లు కొనుగోలు చేసిన అభిమానులకు రీఫండ్ ప్రక్రియను ప్రారంభించింది. అంతే కాకుండా, ఇతర ఫ్రాంచైజీలు కూడా తమ అభిమానులకు డబ్బులు తిరిగి చెల్లించేందుకు ఏర్పాట్లు చేస్తున్నాయి.
ఈ నిర్ణయం క్రికెట్ అభిమానులను నిరాశకు గురిచేసినా, ప్రస్తుత పరిస్థితుల్లో భద్రతే ప్రధానమని బోర్డు వర్గాలు స్పష్టం చేస్తున్నాయి. ఒకవైపు అభిమానులు మ్యాచ్‌లు మళ్లీ ఎప్పుడు మొదలవుతాయా అని ఎదురు చూస్తుండగా, మరోవైపు బీసీసీఐ కొత్త షెడ్యూల్‌పై త్వరలో స్పష్టత ఇవ్వనున్నట్లు సమాచారం.
