ఇప్పుడంటే సినిమా సినిమాకు కమెడియన్‌లు పుట్టుకొస్తున్నారు కానీ.. అప్పట్లో కమెడియన్‌ అంటే ఫలానా పేర్లు మాత్రమే వినిపించేవి. ఆ ఫలానా పేర్లలో సునీల్‌ ఒకడు. బ్రహ్మనందం, ఎమ్‌.ఎస్‌. నారాయణలు టాలీవుడ్‌ను ఏలుతున్న టైమ్‌లో వచ్చి.. వాళ్లకు పోటీగా దిగి స్టార్‌ కమెడియన్‌గా ఎదిగాడు. అప్పట్లో సునీల్‌కు మామూలు డిమాండ్‌ ఉండేది కాదు. ఆయన కోసమే రైటర్‌లు, డైరెక్టర్‌లు స్పెషల్‌గా పంచ్‌లు రాసేవారు. కమెడియన్‌గా కెరీర్‌ పీక్స్‌లో ఉన్నప్పుడు సునీల్‌ అనూహ్యంగా ‘అందాల రాముడి’తో హీరోగా మారాడు. ఈ సినిమా బాగానే ఆడిరది.
ఆ తర్వాతే ఏకంగా రాజమౌళితో ‘మర్యాదరామన్న’ చేసి బంపర్‌ హిట్‌ అందుకున్నాడు. ఇక అదే ఊపులో వరుసగా మేయిన్‌ లీడ్‌ అవకాశాలు వచ్చాయి. అయితే కమెడియన్‌గా ఒక స్టాంప్‌ వేసుకున్న సునీల్‌ను ప్రేక్షకులు హీరోగా యాక్సెప్ట్‌ చేయలేకపోయారు. మళ్లీ ‘అరవింద సమేత’ సినిమాతో క్యారెక్టర్‌ ఆర్టిస్టుగా టర్న్‌ తీసుకుని దిగ్విజయంగా దూసుకుపోతున్నాడు. ముఖ్యంగా రెండేళ్ల నుంచి సునీల్‌ కెరీర్‌ మాములు ఊపు మీద లేదు. పైగా సునీల్‌ సైతం ఇలాంటి సినిమాలే చేస్తా.. అలాంటి పాత్రలే చేస్తానని ఎలాంటి కండీషన్‌లు పెట్టుకోకుండా.. వచ్చిన ప్రతీ అవకాశాన్ని సద్వినియోగం చేసుకుంటూ దూసుకుపోతున్నాడు.
మనోడి క్రేజ్‌ ఇప్పుడు తమిళ తంబీలలో కూడా పాకింది. అక్కడి జనాలు సునీల్‌ వెండితరపై కనిపిస్తే ఈలలు గోలలతో రచ్చ రచ్చ చేస్తున్నారు. జైలర్‌లో మనోడి నటన, గెటప్‌ సాంబార్‌ బ్యాచ్‌కు తెగ నచ్చేసింది. అంతకుముందు ‘మహావీరుడు’లో మంత్రి సెక్రటరీగా చేసిన రోల్‌ కూడా బాగానే పేలింది. ఇక వినాయక చవితి వీక్‌లో రిలీజ్‌ కానున్న మార్క్‌ ఆంటోనిలోనూ సునీల్‌ రోల్‌ మాములుగా ఉండదని చెన్నై టాక్‌. కార్తి జపాన్‌లోనూ సునీల్‌కు మంచి పాత్రే దక్కిందట. ఇవే కాకుండా ఈగై, బుల్లెట్‌ అనే మరో రెండు తమిళ సినిమాల్లో సునీల్‌ కీలకపాత్రలు చేస్తున్నాడు. ఇలా ఒక్క ఏడాదిలోనే ఆరడజను తమిళ సినిమాల్లో సునీల్‌ మెరవడం అంటే విశేషం అనే చెప్పాలి.
ఇలా తెలుగు నటుడి కోసం తమిళ దర్శకులు సీన్స్‌ రాసుకోవడం నిజంగా గొప్ప విషయమే. ప్రస్తుతం సునీల్‌ చేస్తున్న సినిమాల్లో సరైన రోల్స్‌ పడాలే కానీ.. మనోడి క్రేజ్‌ ఎక్కడివరకు వెళ్తుందో ఊహించడం కష్టమే.