ఉద్యోగ భవిష్య నిధి (EPF) ఉపసంహరణ ఇకపై మరింత సులభతరం కానుంది. ఇప్పటివరకు పీఎఫ్ నగదు పొందేందుకు కొన్ని రోజులు పట్టేది. ఇకపై ఈ ప్రక్రియ వేగవంతం అవుతూ, ఉద్యోగులకు అత్యవసర సమయాల్లో తక్షణ సాయం అందించేలా మారనుంది. కేంద్ర ప్రభుత్వం ఈపీఎఫ్ ఉపసంహరణ విధానాన్ని మరింత వేగవంతం చేసేందుకు ATM, యూపీఐ (UPI) ద్వారా నగదు పొందే అవకాశాన్ని అందుబాటులోకి తేనుంది. ఇది లక్షలాది మంది ఉద్యోగులకు ఉపయోగపడే మార్పుగా నిలవనుంది.
ఇప్పటికే కార్మిక శాఖ మంత్రి మన్‌సుఖ్ మాండవీయ, ATM ద్వారా పీఎఫ్ ఉపసంహరణను జూన్ నాటికి అందుబాటులోకి తేనున్నట్లు ప్రకటించారు. ప్రస్తుతం బ్యాంక్ ఖాతా ద్వారా మాత్రమే పీఎఫ్ ఉపసంహరణ ఉండగా, కొత్తగా ATM నుంచి నగదు పొందే సౌకర్యం కల్పించడం వల్ల ఖాతాదారులు తాము కోరిన సమయానికే తమ సొమ్మును పొందగలుగుతారు. ఇది ఉద్యోగులకు మరింత స్వేచ్ఛను కల్పించే పరిణామంగా చెప్పుకోవచ్చు.
అంతేకాదు, యూపీఐ (UPI) ద్వారా కూడా ఈపీఎఫ్ ఉపసంహరణకు కేంద్రం ప్రణాళికలు సిద్ధం చేస్తోంది. నేషనల్ పేమెంట్స్ కార్పొరేషన్ ఆఫ్ ఇండియా (NPCI)తో ఈపీఎఫ్ఓ చర్చలు జరుపుతుండగా, మే లేదా జూన్ నాటికి యూపీఐ ద్వారా నగదు బదిలీ సౌకర్యం అందుబాటులోకి వచ్చే అవకాశం ఉంది. దీని ద్వారా గూగుల్ పే, ఫోన్‌పే వంటి యాప్‌ల సహాయంతో ఉద్యోగులు పీఎఫ్ ఖాతా నుంచి నేరుగా తమ బ్యాంక్ ఖాతాలోకి డబ్బును బదిలీ చేసుకోవచ్చు.
ఇప్పటికీ కొన్ని ప్రశ్నలకు సమాధానం రావాల్సి ఉంది. రోజుకు ఎంత మొత్తం ఉపసంహరించుకోవచ్చు? ఏమైనా పరిమితులు విధిస్తారా? వంటి అంశాలపై స్పష్టత ఇంకా లేదు. అయితే, నిపుణుల అభిప్రాయం ప్రకారం, ఈ కొత్త మార్గం ఉద్యోగులకు చాలా ఉపయోగపడినా, భవిష్య నిధిని తరచుగా ఉపసంహరించుకోవడం వల్ల భవిష్యత్తులో ఆర్థిక నష్టాలు వాటిల్లే అవకాశముందని చెబుతున్నారు.
