జమ్మూ కాశ్మీర్లో ఉగ్రవాదుల చెర నుండి ప్రజలను విముక్తం చేయడానికి భద్రతా బలగాలు చేపట్టిన ప్రత్యేక ఆపరేషన్ ‘‘మహదేవ్’’ ఇప్పుడు కీలక దశలోకి చేరుకుంది. తాజాగా కుల్గాం జిల్లా అకల్ దేవ్సర్ ప్రాంతంలో శుక్రవారం సాయంత్రం భద్రతా బలగాలు, ఉగ్రవాదుల మధ్య తీవ్ర కాల్పులు చోటుచేసుకుంది. భారత సైన్యం, సీఆర్పీఎఫ్, జమ్మూ కాశ్మీర్ పోలీసులు కలిసి సంయుక్తంగా ఈ ఆపరేషన్ నిర్వహించాయి.
తదుపరి సమాచారం మేరకు సెర్చ్ ఆపరేషన్ కొనసాగుతుండగా, దాగుండి ఉన్న ఉగ్రవాదులు భద్రతా బలగాలపై కాల్పులకు తెగబడ్డారు. ప్రస్తుతం ఇద్దరు నుంచి ముగ్గురు ఉగ్రవాదులు ట్రాప్లో చిక్కుకున్నట్టు నిఘా వర్గాలు వెల్లడించాయి. వీరిని పాకిస్తాన్ ప్రేరిత ఉగ్రవాద సంస్థ లష్కరే తోయిబా సభ్యులుగా అనుమానిస్తున్నారు.
ఈ ఆపరేషన్లో భాగంగా శ్రీనగర్ సమీపంలోని దచిగామ్ నేషనల్ పార్క్ పరిసర ప్రాంతాల్లో అనుమానాస్పద కదలికలను గుర్తించిన భద్రతా బలగాలు, ఆ ప్రాంతంలోనూ ముమ్మరంగా గాలింపు కొనసాగిస్తున్నాయి. టీఆర్ఎఫ్ (ది రెసిస్టెన్స్ ఫ్రంట్) అనే లష్కర్ అనుబంధ సంస్థకు చెందిన మరో ఇద్దరు ఉగ్రవాదులు అడవుల్లో దాక్కున్నట్టు సమాచారం. ఇప్పటికే అదే మూడవారంలో టీఆర్ఎఫ్కు చెందిన ఐదుగురు ఉగ్రవాదుల బృందాన్ని ట్రాక్ చేసిన భద్రతా బలగాలు, గత సోమవారం జరిగిన ఎన్కౌంటర్లో ముగ్గురిని హతమార్చాయి. మిగిలిన ఇద్దరిని పట్టుకునేందుకు దచిగామ్ అడవుల్లో ప్రస్తుతం సైనికులు శోధన చర్యలు ముమ్మరం చేశారు.
ఇప్పటికే పలు కీలక ఉగ్ర ముఠాలను విచ్ఛిన్నం చేసిన భద్రతా బలగాల ఆపరేషన్ మహదేవ్, మరో ఘట్టానికి చేరుకుంటోంది. జాతీయ భద్రతను బెదిరించే ఏ ఒక్కరూ విడిచిపెట్టే ప్రసక్తే లేదన్న సంకల్పంతో ముందుకుసాగే ఈ ఆపరేషన్ విజయవంతం కావడం పట్ల కశ్మీర్ ప్రజల్లో భద్రతాపై విశ్వాసం మరింత బలపడుతోంది.