ఐపీఎల్ 2025లో చెన్నై సూపర్ కింగ్స్ తరఫున బరిలోకి దిగిన మహేంద్ర సింగ్ ధోనీ బ్యాటింగ్ ఆర్డర్ ఇప్పుడు తీవ్ర చర్చనీయాంశంగా మారింది. ఇటీవల రాయల్ ఛాలెంజర్స్ బెంగళూరు జట్టుతో జరిగిన మ్యాచ్‌లో ధోనీ తొమ్మిదో స్థానంలో బ్యాటింగ్‌కు రావడంతో అభిమానుల్లో అసంతృప్తి మొదలైంది. మ్యాచ్ చివరలో అవసరమైన వేగం తీసుకురావాల్సిన సమయంలో ధోనీ బరిలోకి రావడం ఆలస్యం కావడం గమనార్హం.
ఈ అంశంపై టీమిండియా మాజీ క్రికెటర్ మనోజ్ తివారీ స్పందిస్తూ ధోనీ నిర్ణయాన్ని విమర్శించారు. “ధోనీ తన ఆటకు అనుగుణంగా ముందే రావాల్సిన అవసరం ఉంది. అతని అనుభవం, ఫినిషింగ్ సామర్థ్యం ఉంటే చివరిలో కాకుండా ముందుగానే బ్యాటింగ్‌కు రావడం జట్టు ప్రయోజనాలకు అనుకూలం,” అని అన్నారు. అయితే సీఎస్కే మేనేజ్‌మెంట్ ధోనీకి నిజమైన సలహా ఇవ్వలేకపోయిందని, వారంతా ధోనితో భయపడి ఉండొచ్చని అన్నారు.
ధోనీ ఏ నిర్ణయం తీసుకున్నా అది ఫైనలే అనే పరిస్థితి ఉండటం జట్టుకు ఇబ్బందిగా మారుతోందని తివారీ అభిప్రాయపడ్డారు. “ధోనీ తన ఆటతీరును పునరాలోచించాల్సిన సమయం ఇది. అభిమానులు అతని కోసం ఎదురుచూస్తుంటే, చివరి ఓవర్‌లో రాణించడం కంటే ముందే ఆటను మెరుగ్గా గణించగలడు,” అని తెలిపారు. తాను చెబుతున్నది ధోనిపై అభిమానంతోనేనని, జట్టు గెలుపు కోణంలో అలా భావిస్తున్నానని స్పష్టం చేశారు.
ఇక క్రికెట్ విశ్లేషకుల అభిప్రాయం ప్రకారం, ధోనీ ప్రస్తుతం తక్కువ బంతుల్లో ఎక్కువ రన్స్ చేయగల సామర్థ్యం ఉన్నా, మ్యాచ్ పరిస్థితిని బట్టి ముందే వచ్చి ఇన్నింగ్స్‌ను నిర్మించాల్సిన అవసరం ఉంది. అభిమానులు కూడా ధోనీని ఎక్కువగా చూడాలనుకుంటున్నారు. టాప్ ఆర్డర్ కుదిరినప్పుడే జట్టు విజయం వైపు దూసుకుపోతుందని వారి అభిప్రాయం. మరి ఈ విమర్శలపై ధోనీ స్పందిస్తారా లేదా? ముందు స్థానంలో బ్యాటింగ్ చేస్తారా అనే విషయంపై ఆసక్తి నెలకొంది.