Saif Ali Khan: బాలీవుడ్ నటుడు సైఫ్ అలీ ఖాన్‌పై దాడి జరిగింది. ముంబైలోని ఆయన నివాసంలో గుర్తు తెలియని వ్యక్తి కత్తితో దాడి చేయగా, సైఫ్ గాయపడ్డారు. ఈ ఘటన జనవరి 16, 2025, తెల్లవారు జామున 2:30 గంటల ప్రాంతంలో చోటుచేసుకుంది. దాడి తర్వాత సైఫ్‌ను వెంటనే లీలావతి ఆసుపత్రికి తరలించారు, ప్రస్తుతం ఆయన ఆరోగ్యం నిలకడగా ఉంది.
సైఫ్ ఖార్‌లోని ఫార్చ్యూన్ హైట్స్‌లో 11వ అంతస్తులో నివసిస్తున్నారు. రాత్రి, ఒక దొంగ ఆయన ఇంట్లోకి చొరబడ్డాడు. ఇంట్లో పనిచేసే పనిమనిషి నిద్రలేచి, దొంగను చూసి అరిచింది. దీంతో సైఫ్ అలీ ఖాన్ నిద్రలేచి, దొంగను పట్టుకోవడానికి ప్రయత్నించారు. ఈ సమయంలో దొంగ సైఫ్‌పై కత్తితో దాడి చేశాడు. పనిమనిషి మరియు కుటుంబ సభ్యులు సైఫ్‌ను ఆసుపత్రికి తీసుకెళ్లారు.
ముంబై పోలీసులు ఈ ఘటనపై దర్యాప్తు ప్రారంభించారు. దొంగ పరారీలో ఉన్నాడు, అతన్ని పట్టుకోవడానికి పోలీసులు సీసీటీవీ ఫుటేజీలను పరిశీలిస్తున్నారు. సైఫ్ భార్య కరీనా కపూర్ మరియు వారి పిల్లలు సురక్షితంగా ఉన్నారు. కుటుంబం నుండి ఇంకా ఎటువంటి అధికారిక ప్రకటన విడుదల కాలేదు.
సైఫ్ అలీ ఖాన్ ఇటీవలే కుటుంబంతో కలిసి స్విట్జర్లాండ్‌లో నూతన సంవత్సర వేడుకలు జరుపుకుని, ముంబైకి తిరిగి వచ్చారు. ఈ దాడి బాలీవుడ్‌లో కలకలం రేపింది.
