మంచు విష్ణు – శ్రీను వైట్ల కాంబినేషన్ లో 13 సంవత్సరాల క్రితం వచ్చిన ఢీ సినిమాకి సీక్వెల్ రాబోతుందంటూ ఇటీవల మంచు విష్ణు హింట్ ఇచ్చిన సంగతి తెలిసిందే. అన్నట్టుగానే ఈ సినిమా సీక్వెల్ ని మంచు విష్ణు బర్త్ డే సందర్భంగా ప్రకటించారు. డి & డి (D & D) టైటిల్ గా ఫిక్స్ చేసిన చిత్ర యూనిట్ ఈ టైటిల్ కి “డబుల్ డోస్” అనే ట్యాగ్ లైన్ ఇచ్చారు. డబుల్ డోస్ ఉపశీర్షికతో ఢీ ఫ్రాంచైజీలోని మొదటి చిత్రం కంటే డబుల్ డోస్ యాక్షన్ కామెడీ ఉంటుందని దర్శకుడు శ్రీను వైట్ల, హీరో మంచు విష్ణు అంటున్నారు.
ఇక ఈ సినిమాని 24 ఫ్రేమ్స్ ఫ్యాక్టరీలో విష్ణు మంచు నిర్మిస్తున్నారు. మెలోడి బ్రహ్మ మణిశర్మ తనయుడు మహతి స్వర సాగర్ సంగీతం అందిస్తున్నారు. ప్రముఖ యాక్షన్ కొరియోగ్రాఫర్ పీటర్ హెయిన్ ఈ సినిమాకి యాక్షన్ కొరియోగ్రఫీ అందిస్తున్నాడు. కాగా ఢీ సినిమాలో హీరోయిన్ గా జెనీలియా నటించిన సంగతి తెలిసిందే. మరి ఈ సీక్వెల్ లో హీరోయిన్ గా ఎవరు నటిస్తారన్నది సహా మిగతా వివరాలను త్వరలో వెల్లడిస్తారని చెప్పుకొచ్చారు మేకర్స్.
ఇక ప్రస్తుతం మంచు విష్ణు మోసగాళ్ళు అన్న పాన్ ఇండియన్ సినిమాతో ప్రేక్షకుల ముందుకు రాబోతున్నాడు. బాలీవుడ్ సీనియర్ హీరో సునీల్ శెట్టి ఈ సినిమాలో పోలీస్ ఆఫీసర్ గా కనిపిస్తుండగా కాజల్ అగర్వాల్ ఈ సినిమాలో విష్ణు కి సోదరిగా నటిస్తుండటం విశేషం. హాలీవుడ్ దర్శకుడు జెఫ్రీ గీ చిన్ దర్శకత్వం వహిస్తున్నాడు. ప్రధానంగా ఇంగ్లీష్ .. తెలుగు భాషల్లో తెరకెక్కుతున్న ఈ సినిమా మిగతా భాషల్లో డబ్బింగ్ చేసి రిలీజ్ చేయనున్నారు.