Amitabh Bachchann :కొందరి గురించి చెప్పాలంటే వారి పుట్టు పూర్వోత్తరాల నుంచి చెప్పాల్సి ఉంటుంది. మరికొందరి గురించి చెప్పాలంటే మాత్రం కేవలం పేరు చెప్తే చాలు. అలాంటి నటుల్లో ఒకరు బాలీవుడ్ బాస్, బిగ్ బి అని ప్రేమగా పిలుచుకునే స్టార్ హీరో అమితాబ్ బచ్చన్. ఆయన నటన, హావ భావాల గురించి ప్రత్యేకించి చెప్పవలసిన పనిలేదు. ఎంతో మంది నవీన నటీనటులు సైతం ఆయనను ఆదర్శంగా తీసుకుంటారంటేనే తెలుస్తుంది అమితాబ్ ఎంత గొప్ప వ్యక్తో. ఇప్పటి వరకూ హీరోగానే కాక, పలు పాత్రల్లోనూ నటించి, వంద శాతం ఆ పాత్రకు న్యాయం చేయడంలో ఆయనకు ఆయనే సాటి. పలు ప్రముఖ నిర్మాతలు, దర్శకులు సైతం ఆయన డేట్స్ కోసం ఇప్పటికీ ఎదురు చూస్తారంటే మామూలు విషయం కాదు.
ఇకపోతే సోషల్ మీడియాలో ఎపుడూ యాక్టిివ్ గా ఉండే ఈ సూపర్ స్టార్ ఎప్పుడూ ఏదో ఒక పోస్ట్ తో ప్రేక్షకులకు చేరువవుతున్నారు బిగ్ బి. ఇక ఆయన తాజాగా నటించిన ఝుండ్ అనే సినిమా ఎంతటి భారీ విజయాన్ని సొంతం చేసుకుందో అందరికీ తెలిసిందే. రీసెంట్ గా రిలీజ్ అయిన ఈ చిత్రానికి అశేష స్పందన లభిస్తోంది.
అయితే కేవలం సినిమాల పరంగానే కాకుండా అమితాబ్, పలు వాణిజ్య ప్రకటనలు చేస్తూ కూడా తన టాలెంట్ ను ప్రదర్శిస్తున్నారు. కాగా తాజాగా ఓ అడ్వర్టైజ్ షూటింగ్ లో పాల్గొన్న ఆయన గాజు పలకలను పగలగొట్టవలసి వచ్చిందట. మామూలుగా అయితే ఆయనకున్న ఇమేజ్ కి ఏ డూప్ ని పెట్టైనా ఆ సీన్ ను షూట్ చేయొచ్చు. కానీ అలా చేయకుండా ఆయనే స్వయంగా స్టంట్స్ చేస్తానని చెప్పి అందర్నీ ఆశ్చర్య పరిచారట. ఈ విషయాన్ని ఆ యాడ్ ను చిత్రీకరించిన డైరెక్టర్ మనోహర్ వర్మనే స్వయంగా తెలిపారు. దానికి తోడు తగిన జాగ్రత్తలు తీసుకొని ఆ షూట్ కంప్లీట్ చేశామని ఆయన చెప్పారు. ఇక 79 ఏళ్ళ వయసులోనూ విరామం లేకుండా ఆయన పడుతున్న కష్టం, యాక్టింగ్ పై ఆయనకున్న ప్యాషన్ ను చూసి అందరూ తెగ పొగుడుతున్నారు. వయసు అనేది కేవలం శరీరానికే గానీ, టాలెంట్ కి కాదని బిగ్ బి నిరూపిస్తూ పలువురికి ఆదర్శంగా నిలుస్తున్నారు.