వెండితెరపై మనం చూసే హీరోలు, హీరోయిన్లు, క్యారెక్టర్ ఆర్టిస్ట్‌లు వేరు. వారి వ్యక్తిగత జీవితాలు వేరు. అయితే ప్రేక్షకులు మాత్రం తెరపై వారిని అలా చూసి చూసి నిజ జీవితంలోనూ అలాగే ఉంటారని ఫిక్స్ అవుతారు. తల్లి పాత్రలు చేసే వారిని నిజ జీవితంలోనూ అలానే ఉంటారని భ్రమ పడుతుంటారు. అయితే అది చాలా తప్పని ప్రగతి నిరూపిస్తోంది. టాలీవుడ్ హీరోలకు అత్త,అమ్మ పాత్రలకు పెట్టింది పేరైన ప్రగతి సోషల్ మీడియాలో చేసే రచ్చ అందరికీ తెలిసిందే.
ఇక లాక్ డౌన్ మొదలైనప్పటి నుంచి ప్రగతి సోషల్ మీడియాలో మామూలు రచ్చ చేయడం లేదు. ఈ వయసులోనూ విపరీతమైన వర్కౌట్లు చేస్తూ ఎందరికో ఆదర్శంగా నిలుస్తోంది. ఇక డ్యాన్సుల్లో అయితే స్టార్ హీరోయిన్స్‌ను మించి పోతోంది. చిన్నప్పటి నుంచి డ్యాన్సులంటే ఇష్టమని, అయితే తెరపై అంతగా చేసే అవకాశం ఎప్పుడూ రాలేదని, అందుకే సోషల్ మీడియాలో తన ప్రతిభను చూపిస్తున్నానని ప్రగతి పేర్కొంది.
ఇది వరకే ప్రగతి వేసిన స్టెప్పులు తెగ హల్చల్ చేశాయి. తన అబ్బాయితో కలసి లుంగీ కట్టి వేసిన డ్యాన్స్‌లు సోషల్ మీడియాలో దుమ్ములేపాయి. ఇక తాజాగా కజ్‌రారే అనే పాటకు ఐశ్వర్యా రాయ్‌లా నర్తించింది. ఇక ఆమె నడుము తిప్పుతుంటే నెటిజన్లు ముక్కున వేలేసుకున్నారు. ఆమె స్టెప్పులు ప్రస్తుతం తెగ వైరల్ అవుతున్నాయి. మీరు ఏది చేస్తే సంతోషంగా ఉంటారో అదే చేయండి అనే క్యాప్షన్ పెట్టి ఈ డ్యాన్స్ వీడియోను ప్రగతి షేర్ చేసింది.