అద్భుతమైన కథలు, సహజ నటన, సస్పెన్స్‌తో మలయాళ సినిమాలు ఎప్పుడూ ప్రత్యేకంగా నిలుస్తుంటాయి. తాజాగా అదే కోవలో థియేటర్లను కుదిపేసిన చిత్రం ‘తుడరుమ్’. స్టార్ హీరో మోహన్ లాల్ నటించిన ఈ చిన్న బడ్జెట్ క్రైమ్ థ్రిల్లర్ అంచనాలకు మించి వసూళ్లు రాబడుతూ ఇండస్ట్రీలో సెన్సేషన్ సృష్టిస్తోంది. దర్శకుడు తరుణ్ మూర్తి తెరపై తీసుకొచ్చిన కథనం ప్రేక్షకులను భావోద్వేగాల ఉప్పెనలో ముంచెత్తింది.
ఏప్రిల్ 24న రిలీజ్ అయిన ఈ చిత్రం కేవలం రూ.28 కోట్ల బడ్జెట్‌లో రూపొందించబడినా, కేరళ బాక్సాఫీస్ వద్దనే రూ.100 కోట్ల మార్క్‌ను దాటి, ప్రపంచవ్యాప్తంగా రూ.200 కోట్ల గ్రాస్‌ను నమోదు చేసింది. మలయాళంలో అత్యంత వేగంగా 200 కోట్ల క్లబ్‌లోకి చేరిన మూడో సినిమాగా ‘తుడరుమ్’ ప్రత్యేక గుర్తింపు పొందింది. మోహన్ లాల్ సరసన శోభన తన పాత్రతో ఆకట్టుకోగా, మిక్కీ జె మేయర్ అందించిన నేపథ్య సంగీతం, భావోద్వేగ సన్నివేశాలకు బలాన్ని ఇచ్చింది. త్వరలో ఈ సినిమా జూన్‌లో హాట్‌స్టార్ లో స్ట్రీమింగ్ కానుందన్న వార్త ప్రేక్షకుల ఉత్కంఠను పెంచుతోంది.
కథలో మోహన్ లాల్ ఓ సాధారణ ట్యాక్సీ డ్రైవర్ పాత్రలో కనిపిస్తారు. కుటుంబాన్ని ప్రేమించే సాధు వ్యక్తి జీవితంలో ఊహించని మలుపు ఎలా కలకలం రేపిందనేది కథా బలం. తన కొడుకు కారులో స్నేహితులతో కలిసి చెన్నై వెళ్లిన సమయంలో పోలీసులు కారులో గంజాయి పట్టుకుని కేసు నమోదు చేస్తారు. నిష్పక్షపాతంగా జీవించే వ్యక్తి కొడుకు కారణంగా కలతల్లో పడిపోతే, అందులో దాగి ఉన్న నిజం ఎలాంటి మలుపులు తిరుగుతుందనేది కథను ఆసక్తికరంగా మలిచింది. సింపుల్ కథనం మీద లోతైన ఎమోషన్స్, ధైర్యంగా తీసుకున్న న్యాయపోరాటం ఈ సినిమాకు హార్ట్‌గా నిలిచాయి.