ఒకప్పుడు అరటిపండు అంటే భద్రమైన, పిల్లల నుంచి వృద్ధుల వరకు అందరూ నిశ్చింతగా తినే పండు. కానీ కాలం మారింది. ఇప్పుడు మార్కెట్లో కనిపించే అరటిపండ్లను చూస్తే ఒక్క ప్రశ్నే వెంటాడుతోంది .. ఇవి నిజంగా సహజంగా పండినవేనా? త్వరగా అమ్మకాల కోసం కొందరు వ్యాపారులు ప్రమాదకర రసాయనాలతో పండ్లను కృత్రిమంగా పండిస్తుండటంతో, ఆరోగ్యానికి పెద్ద ముప్పు ఏర్పడుతోంది.
సహజంగా పండే అరటిపండ్లు చెట్టుపైనే లేదా నిల్వ సమయంలో ‘ఇథిలీన్’ అనే సహజ వాయువు ద్వారా నెమ్మదిగా పండుతాయి. ఈ ప్రక్రియలో పండు లోపల, బయట సమానంగా పండుతూ పోషక విలువలను నిలుపుకుంటుంది. కానీ మార్కెట్లో ఎక్కువగా కనిపిస్తున్న కొన్ని అరటిపండ్లు మాత్రం కాల్షియం కార్బైడ్ వంటి రసాయనాలతో పండించబడుతున్నవే. ఇవి విడుదల చేసే ‘ఎసిటలీన్’ వాయువు పండును లోపల పండనివ్వకుండా, బయట తొక్కను మాత్రమే పసుపు రంగులోకి మార్చేస్తుంది.
ఇలాంటి అరటిపండ్లు చూడటానికి చాలా ఆకర్షణీయంగా, ఒకే రంగులో మెరిసిపోతూ కనిపిస్తాయి. కానీ ఇవే ప్రమాదానికి సంకేతాలు. సహజంగా పండిన అరటిపండ్లపై చిన్న చిన్న గోధుమ లేదా నల్ల మచ్చలు ఉండటం, కొద్దిగా పచ్చదనం కనిపించడం సహజ లక్షణాలు. రసాయన పండ్లు మాత్రం బొమ్మలాగా మెరిసిపోతాయి. వాసన కూడా పెద్ద సంకేతమే. సహజ అరటిపండుకు దగ్గరగా తీసుకెళ్తే తీయని వాసన వస్తుంది. కృత్రిమంగా పండించిన వాటికి మాత్రం వాసనే ఉండదు. పండును కోసినప్పుడు లోపలి భాగం తెల్లగా, గట్టిగా ఉంటే అది రసాయన పండు అని గుర్తించవచ్చు. సహజ పండు అయితే లోపల మెత్తగా, సమానంగా పండినట్లు ఉంటుంది.
అందంగా కనిపిస్తుందనే కారణంతోనే పండ్లను ఎంచుకోవడం ఇక మానేయాల్సిన సమయం వచ్చింది. కొంచెం పచ్చగా ఉన్న అరటిపండ్లను కొనుగోలు చేసి ఇంట్లోనే సహజంగా పండించుకోవడం ఉత్తమం. స్థానిక రైతులు, చిన్న మార్కెట్ల నుంచి పండ్లు తీసుకోవడం ద్వారా ఆరోగ్యంతో పాటు రైతుకూ మద్దతు ఇవ్వొచ్చు. ఆహారం మందులకంటే గొప్పది అంటారు పెద్దలు. కానీ అదే ఆహారం విషంగా మారితే ప్రమాదం తప్పదు. కాబట్టి తదుపరి సారి అరటిపండ్లు కొనేటప్పుడు కాస్త జాగ్రత్తగా చూడండి. మీ ఆరోగ్యాన్ని కాపాడుకునే తొలి అడుగు అదే.