తెలంగాణ రాజకీయాల్లో ఎన్నో ఎన్నికలను ధాటిగా ఎదుర్కొన్న బీఆర్ఎస్ పార్టీ ఈసారి మాత్రం నిశ్శబ్దంగా ఉంది. త్వరలో మూడు ఎమ్మెల్సీ స్థానాలకు జరిగే ఎన్నికలపై గులాబీ పార్టీ నేతలు ఎలాంటి స్పందన కనబరచడం లేదు. రెండు ఉపాధ్యాయ ఎమ్మెల్సీ స్థానాలు, ఒక పట్టభద్రుల ఎమ్మెల్సీ స్థానానికి నామినేషన్ ప్రక్రియ కొనసాగుతున్నా, బీఆర్ఎస్ పోటీ చేస్తుందా లేదా అన్నదానిపై ఇప్పటివరకు స్పష్టత లేదు.
ఈ ఎన్నికల్లో పోటీకి దూరంగా ఉంటే వచ్చే నష్టాన్ని పరిగణలోకి తీసుకుని బీఆర్ఎస్ మౌనాన్ని వ్యూహంగా ఉపయోగించుకుంటోందని విశ్లేషకులు భావిస్తున్నారు. సాధారణంగా బలమైన ప్రాంతాల్లో గట్టి పోటీ ఇవ్వాలని భావించే గులాబీ పార్టీ, ఇప్పుడు మౌనం పాటించడం అనేక అనుమానాలకు తావిస్తోంది. పోటీ చేసి ఓటమిని ఎదుర్కొంటే రాజకీయంగా మరింత ఇబ్బంది ఏర్పడుతుందని, అందుకే ఈసారి వెనుకడుగు వేసిందన్న అభిప్రాయం వ్యాప్తిలో ఉంది.
ఉపాధ్యాయ ఎమ్మెల్సీ ఎన్నికల్లో ఉపాధ్యాయ సంఘాల ప్రభావం ఎక్కువగా ఉంటుంది. అలాగే, పట్టభద్రుల ఎమ్మెల్సీ స్థానంలో బీజేపీ వ్యూహాత్మకంగా వ్యవహరించే అవకాశం ఉంది. మరోవైపు అధికారంలో ఉన్న కాంగ్రెస్ పోటీలో నిలిచి మెజారిటీ సాధించే అవకాశముంది. ఈ పరిస్థితుల్లో గులాబీ నేతలు తాము క్షీణించిన పరిస్థితిని ఎక్కడ బహిరంగంగా వెల్లడించుకునే పరిస్థితికి వచ్చేస్తామా? అన్న ఆలోచనతో వెనుకడుగు వేసినట్లు తెలుస్తోంది.
ఒకప్పుడు ప్రత్యర్థులపై తీవ్ర విమర్శలు చేసిన బీఆర్ఎస్ నాయకత్వం, ఇప్పుడు ఎన్నికల బరిలోకి దిగకపోవడం ఆసక్తికరంగా మారింది. ఎప్పుడూ ముందుండే గులాబీ పార్టీ నేతలు ఇప్పుడు మౌనం పాటించడం, తమ మద్దతుదారులకు ఏవిధంగా అర్థమవుతుందో అనేది ఆసక్తికరంగా మారింది.
