ప్రపంచంలోనే అతిపెద్ద మతపరమైన సమాగమంగా పేరుగాంచిన మహాకుంభమేళా అంగరంగ వైభవంగా ముగిసింది. ఉత్తరప్రదేశ్‌లోని ప్రయాగ్‌రాజ్‌లో 45 రోజులపాటు సాగిన ఈ మేళా మహాశివరాత్రి నాడు సాంప్రదాయ రీతిలో పూర్తి అయ్యింది. ఈసారి భక్తుల రద్దీ చరిత్రలో ఎన్నడూ లేనంతగా నమోదైంది. గంగ, యమున, సరస్వతి సంగమంలో స్నానం చేయడానికి 66 కోట్లకు పైగా భక్తులు తరలిరావడం విశేషంగా మారింది. అమెరికా జనాభాను దాటేంత భక్తులు కుంభమేళాకు హాజరుకావడం, ఈ వేడుకకు అంతర్జాతీయ గుర్తింపు పెరిగిందనే విషయాన్ని నిరూపిస్తోంది.
ఈ మహాకుంభమేళా ముగిసిన వెంటనే భక్తులలో తదుపరి కుంభమేళా ఎప్పుడు, ఎక్కడ జరుగుతుందనే ఆసక్తి నెలకొంది. అధికారిక సమాచారం ప్రకారం, వచ్చే కుంభమేళా 2027లో మహారాష్ట్రలోని నాసిక్‌లో జరగనుంది. గోదావరి నదీ తీరాన ఉన్న త్రయంబకేశ్వర్‌లో జులై 17 నుంచి ఆగస్టు 17 వరకు ఈ మేళా జరగనుంది. శివ భక్తులకు ఎంతో పవిత్రమైన 12 జ్యోతిర్లింగాలలో ఒకటైన త్రయంబకేశ్వర్ ఆలయం అక్కడ ఉండటంతో, భక్తులకు ఈ కుంభమేళా మరింత విశేషమైనదిగా మారనుంది. మహారాష్ట్ర ప్రభుత్వం ఈసారి అత్యాధునిక సాంకేతికతను ఉపయోగించి మరింత భారీగా ఏర్పాట్లు చేయనున్నట్లు వెల్లడించింది.
అంతే కాకుండా, కుంభమేళా ఎందుకు మూడు సంవత్సరాలకోసారి జరుగుతుందనే అంశం కొందరికి ఆశ్చర్యంగా అనిపించొచ్చు. ఈ పర్వదినం ప్రయాగ్‌రాజ్, హరిద్వార్, నాసిక్, ఉజ్జయినిలో మూడేళ్లకోసారి నిర్వహించబడుతుంది. అయితే 12 ఏళ్లకోసారి జరిగే కుంభమేళానే పూర్తి కుంభమేళాగా పరిగణిస్తారు. ఇక 144 ఏళ్లకు ఒకసారి జరిగే ఈ వేడుకే మహాకుంభమేళాగా వ్యవహరించబడుతుంది. 2025లో మహాకుంభమేళా జరిగిన నేపథ్యంలో, 2027లో నాసిక్‌లో జరిగే ఈ మేళా సాధారణ కుంభమేళాగా జరుగనుంది.
ప్రపంచవ్యాప్తంగా ఉన్న భక్తులు, రాజకీయ నేతలు, ప్రముఖులు కూడా ఈసారి మహాకుంభమేళాకు హాజరయ్యారు. ప్రధానమంత్రి నరేంద్ర మోదీ, యూపీ సీఎం యోగి ఆదిత్యనాథ్, పారిశ్రామిక దిగ్గజాలు ముకేశ్ అంబానీ, గౌతం అదానీ వంటి ప్రముఖులు ఈ పవిత్ర మేళాలో పాల్గొన్నారు. అంతేకాదు, బాలీవుడ్ నుంచి అక్షయ్ కుమార్, కత్రినా కైఫ్, విక్కీ కౌశల్ లాంటి నటీనటులు కూడా మేళాకు విచ్చేశారు. అంతర్జాతీయంగా కూడా ఈ మహాసభ ప్రాముఖ్యత పెరుగుతుండటంతో 77 దేశాలకు చెందిన 118 మంది దౌత్యవేత్తలు కూడా ఈ మేళాలో పాల్గొన్నారు. మొత్తంగా, ఈ మహా కుంభమేళా భక్తుల మనసుల్లో చిరస్థాయిగా నిలిచిపోయేలా జరిగింది.
