తెలంగాణ రాజకీయాల్లో మరో ఆసక్తికర పరిణామం చోటుచేసుకుంది. కాంగ్రెస్ నుంచి బహిష్కరణకు గురైన ఎమ్మెల్సీ తీన్మార్ మల్లన్న అకస్మాత్తుగా బీఆర్ఎస్ పార్టీ కార్యాలయంలో కనిపించడం రాజకీయ వర్గాల్లో చర్చనీయాంశంగా మారింది. ప్రధాన ప్రతిపక్షం నేతలైన కేటీఆర్, హరీశ్ రావులను ఆయన కలిసి, బీసీ బిల్లుకు మద్దతు ఇవ్వాలని విజ్ఞప్తి చేశారు. ఈ సమావేశం అనంతరం, మల్లన్న బీఆర్ఎస్ వైపు వెళ్తున్నారా అనే ఊహాగానాలు రాజుకున్నాయి.
తీన్మార్ మల్లన్న గతంలో బీఆర్ఎస్ ప్రభుత్వంపై తీవ్ర విమర్శలు చేశారు. ముఖ్యంగా గ్రాడ్యుయేట్ ఎమ్మెల్సీ ఎన్నికల సమయంలో బీఆర్ఎస్ అభ్యర్థి రాజేశ్వర రెడ్డిపై తీవ్రమైన పోటీ ఇచ్చారు. కానీ, తక్కువ ఓట్ల తేడాతో ఓడిపోయారు. అప్పటి నుంచి బీఆర్ఎస్ నాయకత్వంపై ఆయన తరచుగా ఆరోపణలు చేస్తూ వచ్చారు. అలాంటి వ్యక్తి ఇప్పుడు ప్రత్యక్షంగా బీఆర్ఎస్ కార్యాలయంలో కనిపించడం కొత్త రాజకీయ సమీకరణలపై సందేహాలను పెంచింది.
కాంగ్రెస్ నుంచి సస్పెన్షన్ అనంతరం, మల్లన్న తన రాజకీయ భవిష్యత్తుపై ఓ స్పష్టమైన దిశలో నడవాల్సిన అవసరం ఏర్పడింది. కాంగ్రెస్ పార్టీలో తిరిగి చేరే అవకాశాలు తక్కువగా ఉండటంతో, ఇతర పార్టీలు లేదా స్వతంత్రంగా పోరాడే అంశాలను పరిశీలించాల్సిన పరిస్థితి ఏర్పడింది. ఈ సమయంలో బీఆర్ఎస్ నేతలతో భేటీ కావడం రాజకీయం మారుతోందన్న సంకేతాల్ని ఇస్తోంది.
అయితే, మల్లన్న మాత్రం తాను బీసీ హక్కుల కోసం కేటీఆర్, హరీశ్ రావులను కలిశానని స్పష్టం చేశారు. కానీ, రాజకీయ విశ్లేషకులు మాత్రం దీనిని మరో విధంగా చూస్తున్నారు. బీఆర్ఎస్ తన బలాన్ని పునరుద్ధరించుకునే ప్రయత్నంలో భాగంగా, తనతో విభేదించిన నేతలతో బంధాలను మెరుగుపర్చే ప్రయత్నం చేస్తోందా లేక మల్లన్న తన కొత్త రాజకీయ ప్రయాణానికి బీఆర్ఎస్‌తో తెర తీస్తున్నారా అన్నది తేలాల్సిన విషయమే. ఇదిలా ఉంటే, మల్లన్న భవిష్యత్ రాజకీయ ప్రణాళికపై త్వరలోనే స్పష్టత రావొచ్చు. ప్రస్తుతం ఆయన బీసీ ఉద్యమంపై దృష్టి పెట్టినప్పటికీ, దీని వెనుక రాజకీయ వ్యూహం ఉందా? లేదా? అనేది ఆసక్తికరంగా మారింది. బీఆర్ఎస్‌తో భేటీ తరువాత ఏ నిర్ణయం తీసుకుంటారో చూడాలి.