నియోజకవర్గాల పునర్విభజన (డీలిమిటేషన్) అంశం దేశవ్యాప్తంగా చర్చనీయాంశంగా మారింది. 2029లోగా ఇది అమలులోకి రావడంతో లోక్‌సభ స్థానాలు భారీగా పెరిగే అవకాశముంది. ముఖ్యంగా ఉత్తరాది రాష్ట్రాల్లో జనాభా పెరుగుదల కారణంగా అక్కడ ఎక్కువ సీట్లు కల్పించబడతాయన్న వాదన బలపడుతోంది. అయితే దక్షిణాది రాష్ట్రాలకు తక్కువ ప్రాధాన్యత దక్కుతుందని తమిళనాడు సహా కొన్ని పార్టీలు గళం విప్పుతున్నాయి.
తమిళనాడు అధికార పార్టీ డీఎంకే అఖిలపక్ష సమావేశంలో డీలిమిటేషన్‌ను 30 ఏళ్ల పాటు వాయిదా వేయాలని తీర్మానం చేసింది. దక్షిణాది రాష్ట్రాలకు నష్టం కలిగించే ఈ నిర్ణయాన్ని అంగీకరించబోమని అక్కడి నేతలు స్పష్టంచేశారు. కానీ, ఇదే సమస్యను ఎదుర్కొనే కర్ణాటక, ఆంధ్రప్రదేశ్, తెలంగాణ, కేరళ రాష్ట్రాల్లో పెద్దగా స్పందన కనిపించకపోవడం గమనార్హం.
తెలంగాణ, కర్ణాటకల్లో కాంగ్రెస్ పార్టీ అధికారంలో ఉన్నా, ఇప్పటివరకు డీలిమిటేషన్‌పై ఒక్క ప్రకటన కూడా చేయలేదు. ఆంధ్రప్రదేశ్‌లో అధికారంలో ఉన్న టీడీపీ నేత చంద్రబాబు నాయుడు మాత్రం డీలిమిటేషన్‌ను 30 ఏళ్లపాటు వాయిదా వేయడం సరైన నిర్ణయం కాదని అభిప్రాయపడ్డారు. ప్రతి 25 ఏళ్లకోసారి పునర్విభజన జరగాల్సిన అవసరం ఉందని ఆయన స్పష్టం చేశారు.
తమిళనాడు మినహా ఇతర దక్షిణాది రాష్ట్రాలు ఈ అంశంపై తక్కువ ఆసక్తిని చూపుతున్నట్టు కనిపిస్తోంది. తమిళనాడు పార్టీలు ఆశించిన మద్దతు దక్షిణాదిలోని ఇతర పార్టీల నుంచి రాకపోవడం విశేషం. డీలిమిటేషన్ ద్వారా తమ రాష్ట్రానికి పెద్దగా నష్టం లేదన్న ఉద్దేశంతోనే కర్ణాటక, తెలంగాణ వంటి రాష్ట్రాలు మౌనం పాటిస్తున్నాయా? అనే ప్రశ్నలు తలెత్తుతున్నాయి. చంద్రబాబు వ్యాఖ్యలు ఉత్తరాదికి అనుకూలంగా ఉన్నా, జనాభా తక్కువగా ఉందన్న కారణంతో డీలిమిటేషన్‌ను అడ్డుకోవడం తప్పేనని ఆయన స్పష్టం చేశారు. తమిళనాడు మాత్రం తన ప్రయోజనాలను కాపాడుకునేందుకు బలంగా నిలబడగా, మిగతా దక్షిణాది రాష్ట్రాల మౌనం ఆందోళన కలిగిస్తోంది.
