Sundar Pichai: టెక్ దిగ్గజం గూగుల్ ఆంధ్రప్రదేశ్లోని విశాఖపట్నంలో భారీ పెట్టుబడి పెట్టడానికి గల కారణాలను గూగుల్ చీఫ్ ఎగ్జిక్యూటివ్ ఆఫీసర్ (సీఈఓ) సుందర్ పిచాయ్ వెల్లడించారు. డ్రీమ్ఫోర్స్ అనుబంధ సంస్థ సేల్స్ఫోర్స్ సీఈఓ మార్క్ బెనియాఫ్తో నిర్వహించిన ఇంటర్వ్యూలో ఆయన ఈ వివరాలను తెలియజేశారు.
భారీ పెట్టుబడి, మొట్టమొదటి AI కేంద్రం:
భారత్లో గూగుల్ పెడుతున్న అతిపెద్ద ఆర్టిఫీషియల్ ఇంటెలిజెన్స్ ఇన్వెస్ట్మెంట్గా ఈ ప్రాజెక్ట్ను సుందర్ పిచాయ్ అభివర్ణించారు. విశాఖపట్నంలో రూ. 15 బిలియన్ డాలర్లతో (దాదాపు రూ. 1,25,000 కోట్లు) డేటా, ఆర్టిఫీషియల్ ఇంటెలిజెన్స్ (AI) సెంటర్ను ఏర్పాటు చేయనుంది. ఇది గిగావాట్ ప్లస్ డేటా సెంటర్ కావడం విశేషం. అంతేకాకుండా, అమెరికా వెలుపల గూగుల్ ఏర్పాటు చేస్తోన్న మొట్టమొదటి AI కేంద్రం కూడా ఇదే. దీనికి సంబంధించిన ఒప్పందాలు కూడా కుదిరాయి.
ఈ ప్రాజెక్ట్ను 2026 నుండి 2030 మధ్యకాలంలో పూర్తి చేయాలని లక్ష్యంగా పెట్టుకున్నట్లు పిచాయ్ వివరించారు. ఈ ప్రాజెక్ట్లో గిగావాట్ స్థాయి డేటా సెంటర్ కార్యకలాపాలు, కొత్త ఇంధన వనరుల అభివృద్ధి, ఫైబర్-ఆప్టిక్ నెట్వర్క్ వంటి అంశాలు ఉంటాయని తెలిపారు. అమెరికా వెలుపల తాము చేపట్టిన అతిపెద్ద AI ఇన్వెస్ట్మెంట్ ఇదేనని స్పష్టం చేశారు.
ఇంత భారీ పెట్టుబడి కోసం విశాఖపట్నాన్ని ఎంచుకోవడానికి గల కారణాలను సుందర్ పిచాయ్ వివరించారు. ఆంధ్రప్రదేశ్కు సుదీర్ఘ తీర ప్రాంతం ఉండటం. ప్రత్యేకించి విశాఖపట్నం భౌగోళికంగా, వాతావరణపరంగా అనుకూలంగా ఉండటం. ఈ ప్రాజెక్టుకు అవసరమయ్యే విద్యుత్లో 80 శాతం క్లీన్ ఎనర్జీ (శుభ్రమైన శక్తి) నుంచి తీసుకుంటామని, సబ్-సీ కేబుల్స్ను కూడా ఏర్పాటు చేస్తామని పిచాయ్ తెలిపారు.
ఈ సందర్భంగా తన చిన్ననాటి జ్ఞాపకాలను గుర్తు చేసుకున్నారు. చిన్నప్పుడే విశాఖపట్నం లాంటి అందమైన తీర ప్రాంత నగరాన్ని రైలు ప్రయాణంలో చూశానని, ఆ నగరంతో తనకు ఓ ప్రత్యేక అనుబంధం ఏర్పడిందని అన్నారు. తాను సీఈఓగా ఉన్న గూగుల్ ఇప్పుడు అక్కడ భారీ పెట్టుబడులు పెడుతుండటం సంతోషంగా ఉందని పేర్కొన్నారు.
ఉద్యోగ అవకాశాలు, ప్రాంతీయ అభివృద్ధి:
ఈ పెట్టుబడి వల్ల ఆ ప్రాంతాన్ని పూర్తిగా మార్చివేస్తుందని సుందర్ పిచాయ్ ధీమా వ్యక్తం చేశారు. వేలాదిమందికి ఉద్యోగ, ఉపాధి అవకాశాలు లభిస్తాయని ప్రభుత్వం చెబుతోంది. విశాఖలో ఏర్పాటు చేయబోయే డేటా సెంటర్ వల్ల దాని అనుబంధ రంగాలు, పరిశ్రమలు మరింత వేగంగా పురోగమిస్తాయని పిచాయ్ ఆశాభావం వ్యక్తం చేశారు. గూగుల్ ఇంటర్నల్ చాట్బాట్తో సహా AI ఉత్పత్తుల కార్యకలాపాలు విశాఖ డేటా సెంటర్ నుంచే జరిగే అవకాశాలు ఉన్నాయని తెలిపారు.
ఈ సందర్భంగా ఆర్టిఫీషియల్ ఇంటెలిజెన్స్ రంగంలో పోటీపైనా పిచాయ్ స్పందించారు. గూగుల్ కంటే ముందుగా ఏఐ టూల్ను అందుబాటులోకి తెచ్చిన ఓపెన్ఏఐ (OpenAI)ను అభినందించారు. తాము అనుకున్నదాని కంటే ముందే దాన్ని విడుదల చేశారని గుర్తు చేశారు. గూగుల్ ఇప్పటికే ఏఐ రీసెర్చ్, చిప్ డిజైన్, ప్రొడక్ట్, ఇన్ఫ్రాస్ట్రక్చర్లో పెట్టుబడులు పెట్టిందని, విశాఖ ప్రాజెక్ట్ కూడా దీని కిందికే వస్తుందని అన్నారు. చాట్జీపీటీ ప్రారంభించిన వెంటనే చాట్బోట్ను విడుదల చేయకూడదని మొదట్లో నిర్ణయించుకున్నా, పోటీ ఉన్నందున జెమిని ఏఐ (Gemini AI)ని ప్రారంభించినట్లు ఆయన వివరించారు.
