జమ్మూ కశ్మీర్‌లోని పహల్గామ్ దాడి దేశాన్ని కలచివేసిన నేపథ్యంలో ప్రధాని నరేంద్ర మోదీ బీహార్‌లో గురువారం జరిగిన బహిరంగ సభలో ఉగ్రవాదులపై తీవ్రస్థాయిలో వ్యాఖ్యానించారు. దేశ ప్రజల హృదయాల్లో కోపాన్ని రెచ్చగొట్టిన ఈ దాడికి కఠిన ప్రతీకారం తీసుకుంటామని హెచ్చరించారు.
ప్రసంగంలో ప్రధానంగా హిందీలో మాట్లాడిన మోదీ, కీలక హెచ్చరిక సమయంలో ఒక్కసారిగా ఇంగ్లీషులోకి మారారు. “India will identify every terrorist, trace them and punish them… We will hunt them down to the ends of the Earth” అని గంభీర స్వరంతో అన్నారు. ఉగ్రవాదులపై అంతర్జాతీయంగా మెసేజ్ ఇచ్చే ఉద్దేశంతోనే ఆయన భాష మార్చినట్లు విశ్లేషకులు అభిప్రాయపడుతున్నారు.
పహల్గామ్ దాడిని ఉద్దేశించి, “ఇది మానవత్వంపై దాడి. అమాయకుల ప్రాణాలను లాక్కొనడమే కాదు, దేశ సంస్కృతి మీదే దాడి” అని మోదీ చెప్పారు. ఉగ్రవాదాన్ని ప్రోత్సహిస్తున్న శక్తులకూ హెచ్చరికగా ఈ భాష్యం మారిందని రాజకీయ విశ్లేషకులు అంటున్నారు.
ప్రత్యక్ష ప్రసంగాన్ని గమనించిన వారంతా, మోదీ ఉగ్రవాదంపై ఉక్కు పట్టు విధించనున్నారనే నమ్మకంతో ఉన్నారు. “భారతదేశం ఈ సవాళ్లను ఎదుర్కొనగల సామర్థ్యం కలిగిన దేశం. మన సంకల్పాన్ని ఎవరూ బలహీనపరచలేరు” అని ఆయన అన్నారు. చివరిగా మోదీ మాట్లాడుతూ, “ఉగ్రవాదంపై పోరాటం లోపం లేకుండా సాగుతుంది. న్యాయం జరిగే వరకూ మేము వెనక్కి తగ్గం” అంటూ పహల్గామ్ ఘటనపై దేశానికి హామీ ఇచ్చారు.
