ప్రపంచంలో ఉన్న ప్రతి రంగును మనం ఎరుపు, నీలం, పసుపు వంటి ప్రాథమిక రంగులను కలిపి తయారైనవే అని అందరికీ తెలుసు. కానీ శాస్త్రవేత్తలు తాజాగా ఎవరూ ఇంతవరకు చూడని ఒక కొత్త రంగును కనుగొనడం ప్రపంచాన్ని ఆశ్చర్యానికి గురి చేసింది. దీనికి వారు ఓలో (OLO) అనే పేరు పెట్టారు. ఈ ఆవిష్కరణ విజ్ఞాన శాస్త్రంలో కొత్త అధ్యాయాన్ని రాసేలా ఉందని నిపుణులు చెబుతున్నారు.
కాలిఫోర్నియా యూనివర్సిటీకి చెందిన ప్రొఫెసర్ రెన్ ఎన్జి సహా పరిశోధకుల బృందం ఈ అద్భుత ప్రయోగాన్ని నిర్వహించింది. ఐదుగురు వాలంటీర్ల కళ్లలో ప్రత్యేకమైన లేజర్ పల్స్ పంపించి వారి రెటీనా సహజంగా చేయలేని స్థాయిలో ఉత్తేజితం చేశారు. ఆ క్షణంలో వాలంటీర్ల కళ్లకు ఇప్పటి వరకు ఎప్పుడూ కనిపించని కొత్త రంగు దర్శనమిచ్చింది. వారు దీనిని నీలం-ఆకుపచ్చ మిశ్రమంలా ఉన్నప్పటికీ స్పష్టంగా చెప్పలేమని పేర్కొన్నారు. ఇది వాస్తవ ప్రపంచంలోని ఎవరూ చూడలేదని తెలిపారు.
దీని వెనుక ఉన్న సైన్స్ ఆశ్చర్యపరుస్తుంది. మన కంటిలోని రెటీనా ఒక నిర్దిష్ట స్థాయి వరకు మాత్రమే రంగులను గ్రహించగలదు. కానీ ఈ లేజర్ ప్రయోగం వల్ల ఆ పరిమితిని మించి పనిచేసి కొత్త అనుభవాన్ని అందించింది. శాస్త్రవేత్తల అభిప్రాయం ప్రకారం ఈ ఫలితాలు భవిష్యత్తులో రంగుల అంధత్వం (color blindness) పరిశోధనకు దారితీస్తాయి. రంగుల మధ్య తేడాను గుర్తించడంలో ఇబ్బంది పడే వారికి ఇది ఒక పెద్ద ఆవిష్కరణ అవుతుందని వారు భావిస్తున్నారు.
‘ఓలో’ అనే కొత్త రంగును సాధారణ పరిస్థితుల్లో మనం చూడలేము. ప్రత్యేక సాంకేతిక పద్ధతుల ద్వారానే ఇది సాధ్యం. ఈ కారణంగా ఇది మరింత రహస్యంగా మారింది. సైన్స్ అడ్వాన్సెస్ జర్నల్లో ప్రచురితమైన ఈ పరిశోధన ఇప్పుడు ప్రపంచవ్యాప్తంగా చర్చనీయాంశమైంది. నిపుణులు చెబుతున్నదేమిటంటే రంగుల కొత్త కోణాలను అర్థం చేసుకోవడం కేవలం శాస్త్రవేత్తలకే కాదు, కళాకారులు, డిజైనర్లు, వైద్యరంగానికీ విప్లవాత్మక మార్పులు తీసుకురాగలదని. భవిష్యత్తులో డిస్ప్లే టెక్నాలజీ, వర్చువల్ రియాలిటీ, ఆర్టిఫిషియల్ ఇంటెలిజెన్స్ రంగాల్లో ఈ కొత్త రంగు ప్రభావం చూపే అవకాశం ఉందని కూడా సూచిస్తున్నారు.
ప్రస్తుతం ఈ ఓలో మన కళ్లకు సాధారణంగా కనిపించకపోయినా, విజ్ఞాన శాస్త్రం మరింత అభివృద్ధి చెందితే రాబోయే తరాలు ఈ కొత్త రంగును సులభంగా చూడగలవేమో అనే ఆసక్తికర చర్చలు నడుస్తున్నాయి.