Yanamala Ramakrishnudu: వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి తాజాగా ప్రకటించిన పాదయాత్రపై తెలుగుదేశం పార్టీ తొలిసారిగా స్పందించింది. టీడీపీ పొలిట్ బ్యూరో సభ్యుడు, మాజీ ఆర్థిక మంత్రి యనమల రామకృష్ణుడు జగన్ ప్లాన్పై నిప్పులు చెరిగారు. జగన్ పాదయాత్ర ప్రజల కోసం కాదని, కేవలం తన స్వార్థ ప్రయోజనాలు మరియు ముఖ్యమంత్రి కుర్చీ కోసమేనని ఆయన మండిపడ్డారు.
నిన్న ఏలూరు జిల్లాలో జరిగిన వైసీపీ నేతల భేటీలో జగన్ చేసిన పాదయాత్ర ప్రకటనపై యనమల స్పందిస్తూ.. “గతంలో ఒక్కసారి అవకాశం ఇస్తేనే రాష్ట్రాన్ని జగన్ సర్వనాశనం చేశారు. ఐదేళ్ల ఆయన పాలన ఆంధ్రప్రదేశ్ను ఇరవై ఏళ్లు వెనక్కి నెట్టింది” అని విమర్శించారు. జగన్ హయాంలో అవినీతి, దోపిడీ, వ్యవస్థీకృత నేరాలు పెచ్చరిల్లాయని, శాంతిభద్రతలు పూర్తిగా విఫలమయ్యాయని ఆయన గుర్తు చేశారు.
జగన్ పేరు చెబితే ప్రజలకు గుర్తొచ్చేది అరాచకం, ధరల పెరుగుదల మరియు ఆర్థిక సంక్షోభం మాత్రమేనని యనమల పేర్కొన్నారు. “జగన్ ప్రవర్తన హిట్లర్, ముస్సోలినీ, తుగ్లక్ వంటి నియంతల తరహాలో ఉంటుంది. అటువంటి ఫ్యాక్షనిస్ట్ స్వభావం ఉన్న వ్యక్తిని ప్రజలు ఎప్పటికీ నమ్మరు” అని ఆయన తేల్చి చెప్పారు.
జగన్ చేసే పాదయాత్రలకు కాలం చెల్లిందని, వైసీపీని ప్రజలు ఇప్పటికే తిరస్కరించారని యనమల అన్నారు. తన వ్యక్తిగత ప్రయోజనాల కోసం ప్రజలను మరోసారి మభ్యపెట్టాలని చూస్తున్నారని, కానీ ఏపీ ప్రజలు వాస్తవాలను గ్రహించారని ఆయన పేర్కొన్నారు. జగన్ పాదయాత్ర ప్రకటనపై టీడీపీ నుంచి వచ్చిన ఈ తొలి స్పందన ఇప్పుడు రాజకీయ వర్గాల్లో హాట్ టాపిక్గా మారింది.
