భారత మహిళా జట్టు మరోసారి చరిత్ర సృష్టించింది. వన్డే ప్రపంచకప్ సెమీఫైనల్లో బలమైన ఆస్ట్రేలియాను మట్టి కరిపిస్తూ ఫైనల్ బరిలోకి అడుగుపెట్టింది. ఆడవాళ్ల చేతిలో ఆస్ట్రేలియా జట్టు ఇంత దెబ్బతిన్న సందర్భం చాలా అరుదు. భారత అమ్మాయిల ఆత్మవిశ్వాసం, దూకుడు, దృఢసంకల్పం అన్నీ కలసి ఓ అద్భుత విజయాన్ని అందించాయి. దేశవ్యాప్తంగా క్రికెట్ అభిమానులు జట్టు ప్రదర్శనపై ఉప్పొంగిపోతున్నారు. “ఇది కేవలం మ్యాచ్ కాదు, భారత మహిళల గర్వం!” అని నెటిజన్లు సోషల్ మీడియాలో సంబరాలు చేసుకుంటున్నారు.
ఈ మ్యాచ్ లో మొదట బ్యాటింగ్ చేసిన ఆస్ట్రేలియా జట్టు మంచి ఆరంభం చేసింది. ఓపెనర్ లీచ్ ఫీల్డ్ దూకుడుగా ఆడి సెంచరీ బాదింది. ఆమె 119 పరుగులు (93 బంతుల్లో 17 ఫోర్లు, 3 సిక్స్లు) సాధించగా, ఆమెతో పాటు ఎలీస్ పెర్రీ 77 పరుగులతో జట్టును బలపరిచింది. చివర్లో గార్డ్నర్ ధాటిగా ఆడింది.. కేవలం 45 బంతుల్లో 63 పరుగులు చేసింది. దీంతో ఆస్ట్రేలియా స్కోరు 49.5 ఓవర్లలో 338కి చేరింది. కానీ ఆ భారీ స్కోరు కూడా భారత జట్టును కదిలించలేకపోయింది. భారత బౌలర్లలో శ్రీ చరణి, దీప్తి శర్మ ఇద్దరూ తలో రెండు వికెట్లు తీసి కీలక సమయాల్లో బ్రేక్ ఇచ్చారు. క్రాంతి గౌడ్, అమన్జ్యోత్ కౌర్, రాధా యాదవ్ ఒక్కో వికెట్తో సహకరించారు. ఫీల్డింగ్లోనూ టీమ్ అద్భుతంగా మెరిసింది.
తర్వాత భారీ లక్ష్యాన్ని ఛేదించడానికి బరిలోకి దిగిన భారత జట్టు ఆరంభంలో కొంత ఒత్తిడిని ఎదుర్కొంది. రెండు త్వరిత వికెట్లు కోల్పోవడంతో స్టేడియంలో కాసేపు నిశ్శబ్దం నెలకొంది. కానీ ఆ తర్వాత రంగంలోకి దిగిన జెమీమా రోడ్రిగ్స్, హర్మన్ప్రీత్ కౌర్ భారత జట్టు అదృష్టాన్ని మార్చేశారు. ఇద్దరి మధ్య 186 పరుగుల అద్భుత భాగస్వామ్యం ఫలితంగా మ్యాచ్ భారత వైపు తిప్పబడింది.
జెమీమా 127 పరుగులు (నాటౌట్)తో బ్యాటింగ్ ప్రదర్శనలో సునామీ సృష్టించగా, కెప్టెన్ హర్మన్ప్రీత్ కౌర్ 89 పరుగులతో అద్భుత నాయకత్వం కనబరిచింది. చివరికి భారత జట్టు 48.3 ఓవర్లలో 5 వికెట్లు కోల్పోయి విజయం సాధించింది. లక్ష్యాన్ని దాటిన వెంటనే జెమీమా బ్యాట్ను పైకి ఎత్తగా, డ్రెస్రూమ్లో ఆనందం ఉప్పొంగింది.
ఈ విజయంతో భారత్ 2025 మహిళల వన్డే ప్రపంచకప్ ఫైనల్కి అర్హత సాధించింది. నవంబర్ 2న జరిగే ఫైనల్లో భారత్ దక్షిణాఫ్రికాతో తలపడనుంది. ఈసారి ట్రోఫీ భారత్ సొంతమవుతుందనే నమ్మకంతో అభిమానులు ఉత్సాహంగా ఎదురుచూస్తున్నారు.