Manmohan Singh: భారత మాజీ ప్రధాని మన్మోహన్ సింగ్ గురువారం రాత్రి ఢిల్లీలోని ఎయిమ్స్ ఆసుపత్రిలో కన్నుమూశారు. 92 ఏళ్ల వయసులో తీవ్ర అనారోగ్యంతో ఆయన తుది శ్వాస విడిచారు. తన పదేళ్ల ప్రధానమంత్రి పదవీకాలంలో దేశానికి అనేక కీలక మార్పులను అందించిన మన్మోహన్ సింగ్ దేశ ఆర్థిక చరిత్రలో చిరస్థాయిగా నిలిచిపోయారు.
మన్మోహన్ సింగ్ 2004-2014 మధ్య యూపీఏ-1, యూపీఏ-2 ప్రభుత్వాలను నడిపారు. ఆయన నేతృత్వంలోనే దేశానికి అనేక ఆర్థిక సంస్కరణలు వచ్చాయి. 1991-96 మధ్య పీవీ నరసింహారావు ప్రభుత్వంలో ఆర్థిక మంత్రిగా పనిచేసినప్పుడు ఎల్‌పీజీ (లిబరలైజేషన్, ప్రైవేటైజేషన్, గ్లోబలైజేషన్) విధానాలను అమలు చేసి దేశ ఆర్థిక వ్యవస్థను నూతన దిశగా మలిపారు. ఇదే దేశ అభివృద్ధికి ప్రగతిపథాన్ని చూపినది.
మన్మోహన్ సింగ్ తన కెరీర్‌లో ఆర్బీఐ గవర్నర్, యూజీసీ చైర్మన్, ప్రణాళిక సంఘం డిప్యూటీ చైర్మన్ వంటి అనేక కీలక పదవులు చేపట్టి సమర్థవంతంగా నిర్వహించారు. ఆయనకు 1987లో పద్మవిభూషణ్ పురస్కారం దక్కగా, 2010లో వరల్డ్ స్టేట్స్ మన్ అవార్డు లభించింది. దేశ రాజకీయ, ఆర్థిక రంగాల్లో ఆయన సేవలు ఎనలేనివి.
1932లో పాకిస్థాన్‌లో జన్మించిన మన్మోహన్ సింగ్, దేశ విభజన తర్వాత కుటుంబంతో కలిసి భారతదేశానికి వచ్చారు. ఆయన తపన, ప్రతిభ, సేవలతో ఒక పెద్ద నాయకుడిగా ఎదిగి, దేశ అభివృద్ధికి తన జీవితాన్ని అంకితం చేశారు. ఆయన మృతితో దేశం గొప్ప ఆర్థికవేత్తను, నాయకుడిని కోల్పోయింది. ఆయన కుటుంబ సభ్యులకు, అభిమానులకు ఇది తీరని లోటు.