టెక్ దిగ్గజం ఎలాన్ మస్క్ మరోసారి వార్తల్లోకి ఎంట్రీ ఇచ్చారు. టెస్లా, స్పేస్‌ఎక్స్ వంటి సంస్థల అధినేతగా తన వ్యాపార సామ్రాజ్యాన్ని విస్తరిస్తూనే, ప్రభుత్వ వ్యవహారాల్లో కీలక పాత్ర పోషించిన మస్క్… ఇప్పుడు అమెరికా ప్రభుత్వ పదవికి రాజీనామా చేశారు. డిపార్ట్‌మెంట్ ఆఫ్ గవర్నమెంట్ ఎఫీషియెన్సీ (డోజ్) చైర్మన్‌గా ఉన్న తన పదవిని వదులుకుంటున్నట్లు సోషల్ మీడియా వేదికగా వెల్లడించారు. ఈ నిర్ణయం రాజకీయ వర్గాల్లో ఆసక్తిని రేపింది.
ప్రభుత్వ ఖర్చులను తగ్గించేందుకు ట్రంప్ సర్కారు రూపొందించిన ప్రత్యేక శాఖగా డోజ్‌ను స్థాపించారు. మస్క్ నేతృత్వంలో ఈ శాఖ అనేక సంస్కరణలను చేపట్టి, వృథా ఖర్చులపై కత్తెర వేసింది. ‘‘ప్రభుత్వ వ్యయ నియంత్రణ కోసం పనిచేసే అరుదైన అవకాశాన్ని ఇచ్చిన ట్రంప్‌కు ప్రత్యేక కృతజ్ఞతలు. నా పాత్ర ముగిసింది. కానీ డోజ్ ముందుకు సాగుతుంది’’ అంటూ మస్క్ వ్యాఖ్యానించారు. ప్రభుత్వంలో తన బాధ్యతను పూర్తిచేసుకున్నానన్న భావనతోనే ఈ నిర్ణయం తీసుకున్నట్లు చెప్పారు.
ఇకపోతే, మస్క్ రాజీనామాతో ఆయన తిరిగి పూర్తి స్థాయిలో వ్యాపారాలపై దృష్టిసారించనున్నారని మార్కెట్ వర్గాలు అంచనా వేస్తున్నాయి. ముఖ్యంగా, ఆర్టిఫిషియల్ ఇంటెలిజెన్స్, రాబోయే తరం ఎలక్ట్రిక్ వాహనాల రంగాల్లో మస్క్‌కి పలు పెద్ద ప్రాజెక్టులు ఉన్నట్లు సమాచారం. ఈ నేపథ్యంలో ఆయన గవర్నమెంట్ పదవి నుంచి తప్పుకోవడం వ్యూహాత్మక నిర్ణయంగా భావిస్తున్నారు. అమెరికాలో ట్రంప్ మరోసారి అధికారంలోకి రావడం, మస్క్ ఇప్పటికే ఆయన్ను బలంగా మద్దతు ఇస్తుండటం వంటి పరిణామాల మధ్య ఈ రాజీనామా ప్రాధాన్యతను సంతరించుకుంది.
