అమెరికా రాజకీయాల్లో మరో ఆసక్తికర పరిణామం చోటుచేసుకుంది. ప్రస్తుత అధ్యక్షుడు డొనాల్డ్ ట్రంప్, మాజీ అధ్యక్షుడు జో బైడెన్‌కు గట్టి ఎదురుదెబ్బ ఇచ్చారు. బైడెన్ ఇకపై దేశ రహస్య సమాచారాన్ని తెలుసుకునే అధికారం లేకుండా ఆయన భద్రతా అనుమతులను రద్దు చేస్తున్నట్లు ట్రంప్ ప్రకటించారు. బైడెన్‌కు ఈ అనుమతులు అవసరం లేదని, ఆయన మతిమరపు సమస్యతో బాధపడుతున్నారని ట్రంప్ ఆరోపించారు.
ఈ నిర్ణయం వెనుక రాజకీయ రివెంజ్ ఉందనే వాదనలు వినిపిస్తున్నాయి. 2020 ఎన్నికల్లో బైడెన్ గెలిచిన తర్వాత, క్యాపిటల్ భవనంపై జరిగిన అల్లర్లు దేశాన్ని కుదిపేశాయి. ఆ సమయంలో ట్రంప్‌కు ఇంటెలిజెన్స్ బ్రీఫింగ్ అనుమతులు రద్దు చేసిన బైడెన్, ఇప్పుడు అదే ఎదురుదెబ్బను ఎదుర్కొంటున్నట్లు కనిపిస్తోంది. ట్రంప్ ఈ చర్యను అధికారికంగా ప్రకటించడంతో, ఇది తీవ్ర చర్చనీయాంశంగా మారింది.
అమెరికాలో మాజీ అధ్యక్షులకు భద్రతా అనుమతులు కల్పించే సంప్రదాయం ఉంది. అయితే, ట్రంప్ దీనికి ముగింపు పలుకుతున్నారు. ఈ నిర్ణయం తర్వాత, బైడెన్ ఇకపై అమెరికా ఇంటెలిజెన్స్ కమ్యూనిటీకి సంబంధించిన కీలక సమాచారాన్ని పొందలేరు. ట్రంప్ మద్దతుదారులు దీనిని సమర్థిస్తుండగా, బైడెన్ వర్గీయులు దీన్ని ప్రతీకార చర్యగా చూస్తున్నారు.
ఈ పరిణామాలు వచ్చే ఎన్నికలపై ప్రభావం చూపే అవకాశం ఉంది. ఇప్పటికే బైడెన్ ఆరోగ్యంపై అనేక విమర్శలు వస్తున్నాయి. ఇప్పుడు భద్రతా అనుమతుల రద్దు జరగడంతో, ఆయన నమ్మకాన్ని మరింత దెబ్బతీసే అవకాశం ఉందని విశ్లేషకులు అభిప్రాయపడుతున్నారు. అయితే, దీనిపై బైడెన్ ఎలా స్పందిస్తారన్నది ఆసక్తిగా మారింది.
