తెలంగాణను అప్పట్లో ఒక్కసారిగా కుదిపేసిన దిల్‌సుఖ్‌నగర్‌ జంట బాంబ్ పేలుళ్ల కేసులో హైకోర్టు కీలక తీర్పు వెల్లడించింది. ఈ కేసులో ఎన్ఐఏ కోర్టు విధించిన ఉరిశిక్షను ఎత్తివేయాలంటూ ఐదుగురు దోషులు వేసిన అప్పీళ్లను తెలంగాణ హైకోర్టు తోసిపుచ్చింది. దీంతో ఎన్ఐఏ కోర్టు తీర్పు అమలులోకి వస్తుంది. 2013 ఫిబ్రవరి 21న హైదరాబాద్‌ దిల్‌సుఖ్‌నగర్‌లో బస్టాప్‌ వద్ద, మిర్చిపాయింట్‌ సమీపంలో పేలుళ్లు జరిగాయి.
ఈ ఘటనలో 18 మంది ప్రాణాలు కోల్పోగా, 130 మందికిపైగా తీవ్రంగా గాయపడ్డారు. విచారణ చేపట్టిన నేషనల్ ఇన్వెస్టిగేషన్ ఏజెన్సీ (ఎన్ఐఏ) ఈ కేసులో ఆరోపణలు పూర్తి చేసి ఐదుగురు నిందితులపై కేసు నమోదు చేసింది. ప్రధాన నిందితుడు రియాజ్ భత్కల్ మాత్రం ఇప్పటికీ పరారీలో ఉన్నాడు. 2016 డిసెంబరులో ఎన్ఐఏ కోర్టు ఈ ఐదుగురికి ఉరిశిక్ష విధించింది. ఈ తీర్పును సమీక్షించాలని హైకోర్టుకు నివేదించగా, దోషులు కూడా తమ పక్షాన్ని వినాలంటూ అప్పీలు చేశారు.
నిందితుల్లో అసదుల్లా అక్తర్, జియా ఉర్‌ రహమాన్, తహసీన్‌ అక్తర్, యాసిన్‌ భత్కల్, అజాజ్‌ షేక్‌ ఉన్నారు. వీరి కేసుపై హైకోర్టులో 45 రోజులపాటు విచారణ సాగింది. ఈ రోజు (మంగళవారం) జస్టిస్ కె. లక్ష్మణ్, జస్టిస్ పి. శ్రీసుధల ధర్మాసనం తుది తీర్పును వెలువరించింది. ఎన్ఐఏ కోర్టు ఇచ్చిన తీర్పును సమర్థిస్తూ, దోషుల అప్పీళ్లను తిరస్కరించింది. దీంతో వారికి విధించిన ఉరిశిక్ష కాస్త ముందడుగు పడింది.
ఈ తీర్పుతో ఈ కేసులో న్యాయం సాధ్యమైందని ప్రజలు భావిస్తున్నారు. ఇప్పటికే ఈ కేసు దేశవ్యాప్తంగా తీవ్ర ఉద్విగ్నతకు కారణమైంది. దోషులపై ఎలాంటి సానుభూతి చూపించరాదని బాధిత కుటుంబాలు వాదించాయి. హైకోర్టు తాజా తీర్పుతో వారికి న్యాయం దక్కిందని పలువురు అభిప్రాయపడుతున్నారు. ఇక దోషులకు తగిన శిక్ష విధించాలని ప్రజలు కోరుతున్నారు.
