ఆషాఢ మాసంలో శ్రీమహావిష్ణువు శయనీ ఏకాదశి రోజున యోగనిద్రలోకి వెళ్లారని.. అనంతరం నాలుగు నెలల తర్వాత కార్తీక మాసంలో ఉత్థాన ఏకాదశి రోజున మేల్కొని భక్తులకు ఆశీర్వాదాలు కురిపిస్తారని పురాణాలు చెబుతున్నాయి. ఈసారి ఆ పవిత్ర దినం నవంబర్ 1, సోమవారం రోజున జరగనుంది. ఈ రోజున విష్ణుమూర్తి నిద్రనుంచి మేల్కొంటారని నమ్మి, భక్తులు ఆయనకు విశేష పూజలు చేస్తారు. శ్రీవిష్ణువు మేల్కొన్న తర్వాత పుణ్యకాలం తిరిగి ప్రారంభమవుతుందని మతపరమైన గ్రంథాలు చెబుతాయి. అందుకే ఈ రోజుతో వివాహాలు, గృహప్రవేశాలు, యజ్ఞాలు, ఇతర శుభకార్యాలు తిరిగి మొదలవుతాయి.
విష్ణుమూర్తి అలంకార ప్రియుడు, పుష్ప ప్రియుడు, తులసీ ప్రియుడు. ఆయనను పూజించే వారు తులసీ దళం, పుష్పాలతో, దీపాలతో సేవ చేస్తే సుఖసంతోషాలు, ధనసమృద్ధి లభిస్తాయని పండితులు చెబుతారు. ఉత్థాన ఏకాదశి నాడు సత్యనారాయణ వ్రతం, విష్ణు సహస్రనామ పారాయణం, గీతా పఠనం చేయడం అత్యంత పుణ్యకరమని నమ్మకం.
పురాణాల ప్రకారం, ఈ రోజున చేసే పూజలు, దానధర్మాలు, ఉపవాసాలు వెయ్యిరెట్లు ఫలితాన్ని ఇస్తాయని విశ్వాసం. అందుకే భక్తులు తెల్లవారుజామునే నదీ తీరాల వద్ద పుణ్యస్నానాలు చేసి, ఆలయ దర్శనం చేసుకుంటారు. ఉసిరి చెట్టు కింద దీపం వెలిగించడం, తులసీ చెట్టుకు ప్రదక్షిణం చేయడం పాప విమోచనానికి దారి తీస్తుందని వేదపండితులు చెబుతారు.
ఇక ఏడాదికి మొత్తం 24 ఏకాదశులు వస్తాయి. వాటిలో కార్తీకమాస ఉత్థాన ఏకాదశి అత్యంత పవిత్రమైనదిగా పరిగణించబడుతుంది. భక్తి, నియమ నిష్టలతో ఈ రోజు ఉపవాసం చేసి, స్వామిని పూజించినవారు జన్మజన్మాల పాపాలు కరిగిపోతాయని, ధనసమృద్ధి కలుగుతుందని విశ్వాసం. భక్తులు ఇప్పటికే ఆలయాల్లో ఉత్సవాల ఏర్పాట్లు ప్రారంభించారు. దేవాలయాలు పూలతో, దీపాలతో అలంకరించబడుతున్నాయి. శ్రీవారి సేవకులు తులసీదళాలతో విరివిగా పూజా సామగ్రి సిద్ధం చేస్తున్నారు. దేశమంతా భక్తి తరంగాలతో మార్మోగుతోంది.
ఈ పవిత్ర దినాన భక్తి పూర్వకంగా పూజలు చేసే వారికి విష్ణుమూర్తి స్వయంగా అనుగ్రహిస్తారని, ఆ దినం భక్తి, నియమ నిష్టలతో గడిపితే జీవితంలో శాంతి, సౌభాగ్యం స్థిరమవుతాయని పండితులు చెబుతున్నారు.