పోలింగ్ ప్రక్రియపై విపక్షాలు చేస్తున్న ఆరోపణలకు కేంద్ర ఎన్నికల ప్రధాన కమిషనర్ రాజీవ్ కుమార్ ఘాటుగా ప్రతిస్పందించారు. లోక్‌సభ ఎన్నికలతో పాటు అసెంబ్లీ ఎన్నికల పోలింగ్ డేటా తారుమారైందన్న ఆరోపణలు తప్పుడు అభిప్రాయాలు అని స్పష్టం చేశారు. పోలింగ్ వ్యవస్థలో ఎలాంటి లోపాలు లేవని, దానిపై అనవసర విమర్శలు చేయడం సరైనది కాదని వ్యాఖ్యానించారు.
‘లోక్‌సభ 2024 అట్లాస్’ ప్రారంభోత్సవంలో రాజీవ్ కుమార్ మాట్లాడుతూ, పోలింగ్ ప్రక్రియలో లక్షల మంది అధికారులు పాలుపంచుకుంటారని, ఈ స్థాయిలో పొరబాటుకు అవకాశం లేదని తెలిపారు. ఎన్నికల కమిషన్ పూర్తి నిష్పక్షపాతంగా పని చేస్తుందని, ఎవరైనా తప్పు చేస్తే కఠిన చర్యలు తప్పవని హెచ్చరించారు. పోలింగ్ డేటా వ్యవస్థ పకడ్బందీగా ఉందని ఆయన స్పష్టం చేశారు.
ఇటీవల విపక్షాలు, సార్వత్రిక ఎన్నికల పోలింగ్ డేటాలో తేడాలు ఉన్నాయంటూ విమర్శలు చేశాయి. ఈ ఆరోపణలపై రాజీవ్ కుమార్ మరోసారి స్పందించి, ఎన్నికల ప్రక్రియకు కట్టుబడి పనిచేసే ఈసీపై అనవసర ఆరోపణలు మానుకోవాలని సూచించారు. పోలింగ్ డేటా పునఃసమీక్షలు, టెక్నాలజీ పటిష్టతతో అవినీతి లేదా తారుమారుకు అవకాశం లేదని స్పష్టం చేశారు. ఈ ప్రకటనతో పోలింగ్ ప్రక్రియపై ఉన్న అనుమానాలకు ఈసీ క్లారిటీ ఇచ్చినట్టైంది. విపక్షాలు చేస్తున్న విమర్శలు, ఈసీ ఇచ్చిన వివరణతో ప్రజల్లో తుది తీర్పు ఎలా ఉంటుందో చూడాలి.
