ఆసియా కప్ చరిత్రలో ఇదే మొదటిసారి.. భారత్, పాకిస్థాన్ జట్లు నేరుగా టైటిల్ కోసం తలపడుతున్నాయి. క్రికెట్ ప్రపంచంలోనే అతి పెద్ద రైవల్రీగా భావించే ఈ పోరు కోసం అభిమానులు ఎంతో ఆతృతగా ఎదురుచూస్తున్నారు. దుబాయ్ అంతర్జాతీయ స్టేడియం వేదికగా ఆదివారం రాత్రి 8 గంటలకు మొదలుకానున్న ఈ ఫైనల్కు ఇప్పటికే టికెట్లు సేల్ అయ్యాయి.
ఈ సీజన్లో భారత్ పాకిస్థాన్ను రెండుసార్లు ఓడించి ఆధిపత్యాన్ని చాటుకుంది. సూర్యకుమార్ యాదవ్ కెప్టెన్సీలో టీమిండియా ఒక్క మ్యాచ్ కూడా ఓడిపోకుండా ఫైనల్ చేరుకోవడం విశేషం. కానీ సూపర్ ఫోర్లో శ్రీలంకతో జరిగిన మ్యాచ్లో ఎదురైన ఇబ్బందులు ఆటగాళ్లను అప్రమత్తం చేశాయి. ముఖ్యంగా శుభ్మన్ గిల్ ఫామ్ లోపం, సూర్యకుమార్ ఫామ్ లేమి భారత్ను ఆందోళన కలిగించే అంశాలు.
మరోవైపు, పాకిస్థాన్ వరుసగా రెండు ఓటముల తర్వాత ఫైనల్లో అడుగుపెట్టింది. వారి బ్యాటింగ్ లైనప్ బలహీనంగా కనిపిస్తోందని విశ్లేషకులు చెబుతున్నారు. కానీ షాహీన్ అఫ్రిది, హారిస్ రౌఫ్, అబ్రార్ అహ్మద్ లాంటి బౌలర్లు ఫార్మ్ లోకి వస్తే భారత్ పై ఒత్తిడి తీసుకురాగలరని క్రికెట్ నిపుణులు అభిప్రాయపడుతున్నారు.
భారత్ తరఫున ఓపెనర్ అభిషేక్ శర్మ ఇప్పటికే రెండు సార్లు పాక్ బౌలర్లను చిత్తు చేశాడు. పవర్ ప్లేలో ఆయన చెలరేగిపోవడం జట్టుకు బలాన్నిస్తోంది. హార్దిక్ పాండ్యా, అక్షర్ పటేల్, బుమ్రా వంటి ఆటగాళ్లు సమన్వయంతో ఆడితే భారత్కు ట్రోఫీ అందుకోవడమే సమయం అని అభిమానులు నమ్ముతున్నారు. ఇక పాక్ జట్టు తమ ఆటగాళ్లపై పూర్తి నమ్మకం ఉంచింది. సల్మాన్ ఆఘా కెప్టెన్సీలో జట్టు చివరి పోరులో మార్పు తీసుకురాగలదా అన్నది చూడాలి.
ఒకవైపు, భారత్ ఆధిపత్యంతో ముందుకు వస్తుండగా, మరోవైపు పాకిస్థాన్ ప్రతిష్టను నిలబెట్టుకోవడమే లక్ష్యంగా తలపడనుంది. ఇరు జట్ల మధ్య ఈ పోరు కేవలం ఒక క్రికెట్ మ్యాచ్ కాదు, కోట్లాది అభిమానుల భావోద్వేగాల సమ్మేళనం. ఈ రాత్రి దుబాయ్ వేదికగా మ్యాచ్ జరగనుంది.