నవ మాసాలు మోసి కన్న బిడ్డను ఎంతో ప్రేమగా చూసుకుంటుంది తల్లి. ఆమె వెచ్చటి ఒడే బిడ్డకు ఆనందం. చిన్నారి ముద్దు ముద్దు మాటలకు మురిసిపోతారు తల్లిదండ్రులు. ఇంకా చెప్పాలంటే చిన్నారులు చేసే పనులు, ముద్దు ముద్దు మాటలు, అల్లరి ఎవరికైనా ఆనందాన్ని ఇస్తాయి. వారి అల్లరే తల్లిదండ్రులకు ఆనందం. ఐదేళ్లు వచ్చే వరకూ కూడా వారిపై చూపించే ముద్దు మురిపాలు మర్చిపోలేకుండా ఉంటాయి. అయితే.. ఇందుకు భిన్నంగా ఓ మహిళ తన బిడ్డను ఇష్టానుసారం కొట్టి.. నేలకేసి కొట్టి.. కాలితో తొక్కిపెట్టి.. ఇష్టానుసారం కొట్టిందంటే ఊహించగలమా? కానీ.. అత్యంత పాశవికమైన ఈ ఘటన జరిగింది.
ఛత్తీస్‌ఘడ్ క్యాడర్‌కు చెందిన ఐఏఎస్ అధికారి అవనీష్ శరణ్ సోషల్ మీడియాలో షేర్ చేసిన ఈ వీడియో ఇంటర్ నెట్ లో వైరల్ అయింది. చూస్తున్న ప్రతిఒక్కరి హృదయం ద్రవించే రీతిలో ఉంది. ఓ మహిళ తన మూడేళ్ల చిన్నారిని దారుణంగా చావ బాదింది. చాలాసేపు కొడుతూనే ఉంది. ఓ దశలో చిన్నారిని పైకెత్తి నేలకేసి కొట్టింది. దెబ్బలు తాళలేక ఏడుస్తూ వెళ్తున్న చిన్నారిని వెంబడించి మరి కొట్టింది. ఏకంగా చిన్నారి మెడపై కాలుతో తొక్కిపెట్టి క్రూరంగా ప్రవర్తించింది. కాళ్లతో తన్నింది. ఏమాత్రం దయ, జాలి లేకుండా చిత్రహింసకు గురి చేసింది.
అయితే.. ఓ వీధిలో జరిగిన అమానుష ఘటనను చుట్టుపక్కల వారు చోద్యం చూడటం విచిత్రంగా అనిపిస్తోంది. చిన్నారిని ఆ మహిళ కొడుతున్న సందర్భంలో ఓ వ్యక్తి అటుగా వెళ్లినా అడ్డుకోలేదు. చుట్టుపక్కల అందరూ చోద్యం చూశారు. వీడియో చివరలో మాత్రం ఓ వ్యక్తి వెళ్లి ఆ మహిళను చెప్పుతో కొట్టాడు. ఆమె చర్యను ఖండించిన వారు చేశారో, వీడియో వైరలే అయిందో కానీ.. పోలీసులు ఆ మహిళను అరెస్టు చేశారు. ప్రస్తుతం ఆమె పోలిస్ స్టేషన్ లో ఉందని తెలుస్తోంది.
https://twitter.com/AwanishSharan/status/1370661375270297602?s=20