తమిళనాట అభిమాన దివంగత ముఖ్యమంత్రి అమ్మ ‘జయలలిత’గారి జీవితం ఆధారంగా ‘తలైవి’ పేరుతో ఓ బయోపిక్ తెరకెక్కుతున్న సంగతి తెలిసిందే. జయలలిత పాత్రలో బోల్డ్ బ్యూటీ కంగనా రనౌత్ నటిస్తోంది. ఇప్పటికే ఈ బయోపిక్ కోసం ప్రత్యేకంగా తమిళం కూడా నేర్చుకుంది ఈ బాలీవుడ్ క్వీన్. అయితే.. ఈ సినిమాలో పలు ఆసక్తికరమైన రూమర్స్ కు సంబంధించిన విషయాలు కూడా ఉంటాయట. అందులో జయలలిత లవ్ ట్రాక్ కూడా.
ముఖ్యంగా అలనాటి అమ్మాయిల కలల స్టార్ హీరో ‘శోభన్ బాబు – జయలలిత’ల మధ్య అనుబంధం పై వచ్చిన రూమర్స్ లో వాస్తవం ఎంత..? వారి మధ్య నిజంగానే ప్రేమ ఉందా..? ఉంటే ఏ కారణాల చేత వాళ్ళు పూర్తిగా దూరం అవ్వాల్సి వచ్చింది.. లాంటి అంశాలతో పాటు రాజకీయంగా జయలలిత పై జరిగిన కుట్రలు, అసెంబ్లీలో ఆమె పై జరిగిన దాడుల్లో అప్పటి ముఖ్యమంత్రి కరుణానిధి పాత్ర ఎంత ఉందనే అంశాలను కూడా ఈ సినిమాలో చూపించబోతున్నట్లు తెలుస్తోంది.
అదేవిధంగా జయలలిత జీవితంలోని ప్రధానమైన ఘట్టాలతో పాటు ఆమె ఆలోచనా విధానాన్ని కూడా సినిమాలో హైలెట్ చేస్తూ స్క్రీన్ ప్లే సాగుతుందట. వాటిల్లో ముఖ్యంగా తమిళ రాజకీయాలను జయలలిత ఎలా శాసించగలిగారు ? ఆ క్రమంలో ఆమె ఎదురుకున్న సవాళ్లు ఏమిటి ? అసలు ఎలాంటి స్థాయి లేని వ్యక్తులకి కూడా టికెట్లు ఇచ్చి ఆమె ఎలా గెలిపించుకోగలిగారు ? అనే విషయాలను కూడా ఈ చిత్రంలో ప్రధానంగా చూపించబోతున్నారు.
మొత్తానికి అమ్మ బయోపిక్ లో ఆమె జీవితంలో చోటు చేసుకున్న ఎవ్వరికీ తెలియని విషయాలు కూడా తెలియనున్నాయి. ప్రముఖ రచయిత విజయేంద్ర ప్రసాద్ రాసిన కథతో తమిళ డైరెక్టర్ ‘ఏ ఎల్ విజయ్’ డైరెక్షన్ లో వస్తోన్న ఈ సినిమా పై భారీ అంచనాలు ఉన్నాయి.