YSRCP: ఘోర ఓటమితో 11 సీట్లకు పరిమితమైన వైఎస్సార్ కాంగ్రెస్ పార్టీ, ఇప్పుడు చతికిలబడిన కార్యకర్తల్లో ఉత్సాహం నింపేందుకు వినూత్న ప్రయత్నాలు చేస్తోంది. పార్టీకి కీలక నేతలు వరుసగా గుడ్‌బై చెప్పుతున్న నేపథ్యంలో, మిగిలిన నేతలను ఎలా అయినా కాపాడుకోవాలన్న ఆతృతతో వైసీపీ తాజా వ్యూహాలను అమలు చేస్తోంది. ఇందులో భాగంగానే, తాజా పరిస్థితులను దృష్టిలో పెట్టుకొని కొత్త పదవులు సృష్టించి, మద్దతుదారులకు వాటిని కట్టబెట్టే పని ప్రారంభించింది.
ఇప్పటి వరకు పార్టీ వ్యవస్థలో లేని రకాలుగా, అనుబంధ విభాగాలకు ‘వర్కింగ్ ప్రెసిడెంట్’ పదవులు ఏర్పాటు చేయడం ద్వారా తాజా ప్రూఫ్ అందింది. ఇది చూస్తుంటే, అధిష్ఠానం పార్టీని ఆదుకునే సామర్థ్యమున్న వారిని ఒకదారి, సామాన్య కార్యకర్తలను మరోదారి పట్టించుకుంటోందన్న వ్యాఖ్యలు వినిపిస్తున్నాయి. నాయకత్వంలో మార్పు అవసరం అంటూ విపక్షాల దెబ్బలు తినే సందర్భాల్లో, వైసీపీ మాత్రం పదవుల ఖాతా విస్తరిస్తూ ముందుకెళ్తోంది.
తాజాగా యువజన విభాగానికి వర్కింగ్ ప్రెసిడెంట్ అనే కొత్త పదవిని ఏర్పాటు చేసి, నందికొట్కూరు నియోజకవర్గ సమన్వయకర్త బైరెడ్డి సిద్ధార్థ రెడ్డిని ఆ స్థానం కల్పించింది. ఓటమికి ముందు సిద్ధార్థ రెడ్డి ‘శాప్’ చైర్మన్‌గా పని చేశారు. అయితే అప్పట్లో ‘ఆడుదాం ఆంధ్రాలో’ కార్యక్రమానికి సంబంధించిన నిధుల దుర్వినియోగంపై తీవ్ర విమర్శలు వెల్లువెత్తిన విషయం తెలిసిందే. అప్పటి క్రీడా శాఖ మంత్రి ఆర్కే రోజా కూడా ఈ వివాదంలో భాగమయ్యారు.
ఇప్పుడు అదే నాయకత్వాన్ని తిరిగి పార్టీ లోపలకి తీసుకోవడం వెనుక ఉన్న ఉద్దేశం ఏంటి? అది భవిష్యత్‌ కోసం నిర్వహించే ప్రయోగమా? లేక పార్టీపై ఉన్న నమ్మకాన్ని ఓ మాయాజాలంతో కప్పిపుచ్చే ప్రయత్నమా అన్నదే ప్రశ్నగా మిగులుతోంది. ఎంతగా పదవులు ఇచ్చినా, ఓటమిని మింగలేని పార్టీ నేతలకు ఇది తాత్కాలిక ఊరట మాత్రమే అని విశ్లేషకులు అభిప్రాయపడుతున్నారు.
