దేశవ్యాప్తంగా ముస్లిం మైనారిటీలను కుదిపేస్తున్న వక్ఫ్ సవరణ చట్టం బుధవారం పార్లమెంట్‌లో ప్రవేశపెట్టబడనుంది. కేంద్రంలో అధికార ఎన్డీఏ భాగస్వామిగా ఉన్న టీడీపీ, ఈ చట్టానికి సహకరించడం ముస్లిం వర్గాల్లో ఆందోళనను పెంచింది. ఎన్డీఏలో బీజేపీ తర్వాత ఎక్కువ ఎంపీలు ఉన్న పార్టీగా టీడీపీ కీలకంగా వ్యవహరిస్తోంది. అటువంటి సమయంలో బిల్లును వ్యతిరేకించకపోవడంపై విమర్శలు వెల్లువెత్తుతున్నాయి.
అయితే టీడీపీ వర్గాలు మాత్రం వివరణ ఇస్తున్నాయి. బిల్లులో కొన్ని మార్పులను ప్రతిపాదించామని, అందులో మూడింటికి కేంద్రం అంగీకరించిందని చెబుతున్నారు. మొదటి మార్పుగా వక్ఫ్ యూజర్‌గా నమోదు అయిన ఆస్తులను తిరిగి పరిశీలించకూడదని పేర్కొన్నారు. రెండో మార్పుగా వక్ఫ్ ఆస్తుల నిర్ణయంలో జిల్లా కలెక్టర్‌కు తుది అధికారంగా ఉండకూడదని సూచించారు. ఇవన్నీ చట్టంలో చేర్చడంపై బీజేపీ ఒప్పందం తెలిపిందని సమాచారం.
మూడో మార్పుగా డిజిటల్ పత్రాల సమర్పణకు గడువు పొడిగించాలని కోరగా, దానికి కూడా ఓకే వచ్చిందని తెలుస్తోంది. అయితే ముఖ్యమైన నాల్గో అంశమైన వక్ఫ్ ఆస్తుల్లో ముస్లిమేతరుల జోక్యాన్ని అనుమతించకూడదన్న టీడీపీ సూచనను మాత్రం కేంద్రం తిరస్కరించింది. అయినా మూడు మార్పులు చట్టంలో చేర్చారనే నమ్మకంతో టీడీపీ బిల్లును అంగీకరించింది.
వైసీపీ మాత్రం ఈ బిల్లుపై పూర్తి వ్యతిరేకంగా వ్యవహరిస్తోంది. ముస్లిం మైనారిటీల అభిప్రాయాల్ని పట్టించుకోకుండా తీసుకువచ్చిన ఈ చట్టం వారికి అన్యాయం చేస్తుందని ఆ పార్టీ అభిప్రాయపడుతోంది. ఇక ఈ పరిణామాల నేపథ్యంలో ముస్లిం వర్గాలు, ప్రజా సంఘాలు పార్టీ లైన్‌లు గమనిస్తున్నాయి. వాస్తవానికి ముస్లిం ఓటు బ్యాంక్‌ను దృష్టిలో ఉంచుకున్న ప్రతి పార్టీ కూడా బాధ్యతగా వ్యవహరించాలని విశ్లేషకుల అభిప్రాయం. వక్ఫ్ చట్టం సవరణపై మళ్లీ రాజకీయ వేడి పెరిగే సూచనలున్నాయి.