విశాఖపట్నం మహానగర పాలక సంస్థలో డిప్యూటీ మేయర్ పదవికి మరోసారి రాజకీయ వేడి రీచ్ అయ్యింది. తాజాగా కూటమి ప్రభుత్వానికి చెందిన జనసేన పార్టీ, విశాఖ డిప్యూటీ మేయర్ అభ్యర్థిగా దల్లి గోవింద్ పేరును అధికారికంగా ఖరారు చేసింది. ఈ మేరకు పార్టీ అధిష్ఠానం సీల్డ్ కవర్‌లో అభ్యర్థి పేరును పంపించి నిర్ణయాన్ని తెలియజేసింది. శుక్రవారం జరగనున్న ఎన్నికల వేళ ఈ ప్రకటన కూటమిలో మరోసారి ఐక్యతను చాటింది.
ఇప్పటికే వైసీపీకి చెందిన మాజీ డిప్యూటీ మేయర్ జియ్యాని శ్రీధర్‌పై అవిశ్వాస తీర్మానం పెట్టిన కూటమి కార్పొరేటర్లు, విజయవంతంగా అతడిని పదవి నుంచి తప్పించారు. దీంతో డిప్యూటీ మేయర్ స్థానానికి ఇటీవల ప్రభుత్వం కొత్తగా నోటిఫికేషన్ జారీ చేయడం తెలిసిందే. ఈ నేపథ్యంలో జనసేన తరఫున గోవింద్ ఎంపిక పలు రాజకీయ విశ్లేషణలకు తావిస్తోంది. ఆయన విశాఖలో ప్రజాదరణ ఉన్న కార్పొరేటర్‌గా మంచి పేరు తెచ్చుకున్న నాయకుడు కావడంతో, ఈ ఎంపిక తేలికగానే జరిగిందని సమాచారం.
కూటమి భాగస్వామ్యంలో కీలక భాగమైన జనసేనకు ఈ స్థానాన్ని కేటాయిస్తూ తీసుకున్న నిర్ణయంతో మరోసారి టీడీపీ, జనసేనల మధ్య సమన్వయం క‌నిపించింది. డిప్యూటీ మేయర్ పదవిపై నేడు జరుగనున్న ఎన్నికపై విశాఖ వర్గాల్లో ఉత్కంఠ నెలకొంది. గోవింద్ అధికారికంగా ఎన్నికైతే, ఇది జనసేనకు పరిపాలనా స్థాయిలో మంచి బలాన్ని తీసుకొచ్చే అవకాశముంది.