Minister Nadendla Manohar: ఆంధ్రప్రదేశ్లో ఎల్పీజీ (LPG) గ్యాస్ సరఫరాకు సంబంధించి వస్తున్న పుకార్లపై పౌరసరఫరాల శాఖ మంత్రి నాదెండ్ల మనోహర్ స్పందించారు. రాష్ట్రంలో వంట గ్యాస్ కొరత ఏమీ లేదని, సరఫరా నిరంతరాయంగా కొనసాగుతుందని ఆయన స్పష్టం చేశారు. ప్రజలు అనవసరంగా భయాందోళన చెంది ‘పానిక్ బుకింగ్స్’ చేయవద్దని ఆయన విజ్ఞప్తి చేశారు.
పుకార్లను నమ్మవద్దు.. ముందస్తు చర్యలు సిద్ధం. గత కొన్ని రోజులుగా సోషల్ మీడియాలో వస్తున్న గ్యాస్ కొరత వార్తలను మంత్రి కొట్టిపారేశారు.
ఆయిల్ మార్కెటింగ్ కంపెనీలతో ప్రభుత్వం నిత్యం సమీక్షలు జరుపుతోందని ఆయన తెలిపారు. ఖతార్లో జరుగుతున్న పరిణామాల నేపథ్యంలో గ్యాస్, ఆయిల్ సరఫరాకు ఆటంకం కలగకుండా రాష్ట్ర ప్రభుత్వం ఇప్పటికే ముందస్తు చర్యలు తీసుకున్నట్లు వెల్లడించారు.
ప్రత్యామ్నాయాలపై దృష్టి, పీఎన్జీ (PNG), ఇండక్షన్ స్టవ్లు, వంట గ్యాస్ వినియోగంలో ఒత్తిడిని తగ్గించేందుకు ప్రభుత్వం ప్రత్యామ్నాయ మార్గాలను ప్రోత్సహిస్తోంది. పట్టణ ప్రాంతాల్లో 60 వేల మందికి పీఎన్జీ గ్యాస్ అందించేలా ప్రణాళికలు సిద్ధం చేశారు. ప్రాధాన్య క్రమంలో ఆస్పత్రులు, వసతి గృహాలు, అన్న క్యాంటీన్లకు దీనిని విస్తరించాలని అధికారులను ఆదేశించారు. అంగన్వాడీ కేంద్రాల్లో గ్యాస్ వినియోగాన్ని తగ్గించేందుకు ఇప్పటివరకు రాష్ట్రవ్యాప్తంగా 54 వేల ఇండక్షన్ స్టవ్లను పంపిణీ చేసినట్లు మంత్రి వివరించారు.
ఓటీపీ (OTP) ద్వారానే డెలివరీ.. బ్లాక్ మార్కెటింగ్పై ఉక్కుపాదం, గ్యాస్ సిలిండర్ల పంపిణీలో పారదర్శకత కోసం కీలక నిర్ణయాలు తీసుకున్నారు. సిలిండర్లు దుర్వినియోగం కాకుండా ఉండేందుకు గృహ వినియోగదారులకు ఓటీపీ (OTP) విధానంలోనే డెలివరీ జరుగుతుందని స్పష్టం చేశారు. గ్యాస్ సిలిండర్లను బ్లాక్ మార్కెట్కు తరలించే వారిపై కఠిన చర్యలు తీసుకుంటామని మంత్రి హెచ్చరించారు. గ్యాస్ ఏజెన్సీల వద్ద ప్రజలు గుమికూడాల్సిన అవసరం లేదని భరోసా ఇచ్చారు.
సీఎం చంద్రబాబు ఆదేశాలు: ముఖ్యమంత్రి నారా చంద్రబాబు నాయుడు ఈ పరిస్థితిపై అధికారులతో సమీక్ష నిర్వహించారు. రాష్ట్రంలో ఎల్పీజీతో పాటు పెట్రోల్, డీజిల్, ఎరువులకు ఎలాంటి లోటు రాకుండా చూడాలని అధికారులను ఆదేశించారు. భవిష్యత్ అవసరాల కోసం పీఎన్జీ వంటి ప్రత్యామ్నాయ ఇంధన వనరులపై ప్రత్యేక దృష్టి సారించాలని సూచించారు.
