అల్లూరి సీతారామరాజు జిల్లా మారేడుమిల్లి ఘాట్ రోడ్డులో ఆదివారం అర్ధరాత్రి తీవ్ర విషాదం చోటుచేసుకుంది. చింతూరు నుంచి అన్నవరం వైపుకు వెళ్తున్న ఓ ప్రైవేట్ ట్రావెల్స్ బస్సు అదుపుతప్పి అనూహ్యంగా లోయలో పడిపోవడంతో అక్కడ ఒక్కసారిగా అల్లకల్లోలం నెలకొంది. భద్రాచలం ఆలయ దర్శనం ముగించుకొని తిరుగు ప్రయాణంలో ఉన్నట్లు చెబుతున్న ఈ బస్సులో పెద్ద సంఖ్యలో ప్రయాణికులు ఉన్నారని సమాచారం. ప్రమాద తీవ్రత చూసిన వారంతా షాక్కు గురయ్యారు.
సూచనల ప్రకారం ఇప్పటి వరకు దాదాపు 15 మంది ప్రాణాలు కోల్పోయినట్టు ప్రాథమిక సమాచారం చెబుతున్నప్పటికీ, అధికారిక సంఖ్య ఇంకా వెలువడలేదు. రాత్రి సమయంలో జరిగిన ఈ ఘటనలో ప్రయాణికులు లోయలోకి పడిపోయిన బస్సులో చిక్కుకుని ఆర్తనాదాలు చేస్తుండగా, తొలుత స్పందించిన స్థానికులు వెంటనే పోలీసులకు, అంబులెన్స్లకు సమాచారం అందించారు. ఘోరమైన పొడవాటి లోయలో బస్సు పడిపోయిన ప్రాంతం చేరుకునేంతవరకూ కూడా రక్షణ సిబ్బంది తీవ్ర ఇబ్బందులు ఎదుర్కొన్నారు.
అంధకారంతో పాటు ఘాట్ ప్రాంతపు ప్రమాదకర మలుపులు రక్షణ చర్యలను మరింత క్లిష్టంగా మారుస్తున్నాయి. బస్సు పూర్తిగా దెబ్బతిన్న పరిస్థితి బయటపడడంతో ప్రయాణికుల సంఖ్యపై స్పష్టత ఇంకా రాలేదు. పోలీసులు, అగ్నిమాపక సిబ్బంది, స్థానికులు కలిసి చిక్కుకున్న వారిని బయటకు తీసేందుకు తీవ్రంగా శ్రమిస్తున్నారు. గాయపడిన పలువరిని సమీప ఆసుపత్రులకు తరలించారు.
అన్నవరానికి వెళ్లే దారిలో జరిగిన ఈ ప్రమాదం స్థానికులను మాత్రమే కాదు, బస్సులో ఉన్న కుటుంబాల్లోనూ తీవ్ర విషాదాన్ని నింపింది. ఘటనపై మరిన్ని వివరాలు కోసం అధికారులు కొనసాగుతున్న రక్షణ చర్యల అనంతరం అధికారిక ప్రకటన విడుదల చేసే అవకాశం ఉంది.