రాజకీయాల్లోకి రావాలా వద్దా అనే విషయంలో అయోమయం ఉండొచ్చు కానీ… ఒకసారి వచ్చాక.. మాట్లాడే ప్రతీ విషయంపైనా, తీసుకునే ప్రతీ నిర్ణయం పైనా పూర్తి స్పష్టత ఉండాలి. ఆ స్పష్టతను మరింత స్పష్టంగా జనాలకు చెప్పగలగాలి. విచిత్రం ఏమిటంటే… ఈ విషయంలో “పూర్తి అస్పష్టత పుష్కలంగా” కలిగి ఉన్నారు పవన్ కల్యాణ్. క్లారిటీ లేని స్టేట్ మెంట్లు, కన్ ఫ్యుజన్ పెంచే ప్రసంగాలు.. కలిపి పవన్ కల్యాణ్ ప్రస్తుతం ఒక అయోమయంతో కూడిన రాజకీయాలు చేస్తున్నారు!
పవన్ కి ఒక స్పష్టత ఉంది! అది.. జగన్ ను అధికారం నుంచి దింపాలని.! పవన్ కి పరిపూర్ణమైన అస్పష్టత కూడా ఉంది! అది… జగన్ ను అధికారం నుంచి ఎలా దింపాలని.! గతకొంతకాలంగా పవన్ ప్రసంగాలు స్పష్టంగా విన్న ఎవరికైనా ఈ సందేహం రాకమానదు!
ఒకసారి… “ప్రతిపక్షాల ఓట్లు చీలకుండా జాగ్రత్తలు తీసుకుంటే వైసీపీని ఓడించటం కష్టంకాదు” అంటారు. మరోసారి… “ప్రతిపక్షాలన్నింటినీ ఏకతాటిపైకి తీసుకొచ్చి వైసీపీని ఓడించటమే తన ధ్యేయం”గా చెబుతారు. ఇవేవీ పవన్ చేతిలో ఉన్న విషయాలు కాదు. ఎందుకంటే… పవన్ చెప్పింది జరగాలంటే… బీజేపీ – కాంగ్రెస్ – టీడీపీ – జనసేన – సీపీఐ – సీపీఎం లు ఒకేతాటిపైకి రావాలి. ఆ కూటమిని జనసేన అధినేత పవన్ లీడ్ చేయాలి. ఇది జరిగేపనేనా? పవన్ కు తెలియంది కాదు! తెలిసి కూడా చెబుతున్నారంటే… అంతకు మించిన అయోమయం లేదు!
ఇదే క్రమంలో తాజాగా… పార్టీ ఆఫీసులో బీసీ సంక్షేమంపై జరిగిన రౌండ్ టేబుల్ సమావేశంలో సైతం ఒక కీలక ప్రకటన చేశారు పవన్! “బీసీలు, దళితులు, కాపులు, కలిస్తే రాజ్యాధికారం తథ్యం” అన్నారు. ఒకవైపు బీసీలు దళితులు కాపులు కలిస్తే రాజ్యాధికారం తథ్యమని చెబుతునే.. మరోవైపు టీడీపీతో పొత్తుకు రెడీ అయితే… పవన్ మాటలను ఎలా అర్ధం చేసుకోవాలి? టీడీపీతో పొత్తు పెట్టుకుంటే… ఖమ్మ సామాజికవర్గానికి చెందిన చంద్రబాబుకి రాజ్యాధికారం వస్తుంది తప్ప… బీసీలకు – దళితులకు – కాపులకు ఎలా వస్తుంది? ఇది మరో అయోమయం స్టేట్ మెంట్!
పవన్ కల్యాణ్ ఇస్తున్న ఆ రెండు స్టేట్ మెంట్లూ ఎంత విభన్నమైనవి అన్నది ఎవరికైనా ఇట్టే అర్ధమయ్యే విషయం. అంత సులువైన విషయం పవన్ కు అర్ధం కాకపోవడం అయోమయం కాక మరేమిటి? లేక, తనకు అన్నీ తెలుసుకానీ.. జనాలే అయోమయంలో ఉంటారు – తన క్రియేటివిటీ వాళ్లకు అర్థం కాదని భావిస్తున్నారా? పవన్ కే తెలియాలి!
ఎందుకంటే… దళితులు – కాపులు – బీసీలకు రాజ్యాధికారం రావాలంటే… వారందరినీ ఏకం చేస్తూ.. చంద్రబాబుకు దూరంగా ఉంటూ పవన్ రాజకీయాలు చేయాలి. జనసేన కాపుల పార్టీ కాదని – రాజ్యాధికారం దక్కని అన్ని వర్గాల పార్టీ అని మాటలు చెప్పుకోవాలి – కొన్ని చేతల్లో చేసి చూపాలి.
లేదంటే… జగన్ ని గద్దెదింపడమే తన లక్ష్యం అని ఫిక్సయితే… అదే లక్ష్యంగా చంద్రబాబుతో కలిసి ముందుకెళ్లాలి. జనసేన కేడర్ కి కూడా… “రాజాధికారం గురించి ఆశలు పెట్టుకొవద్దు, మీరు నా పల్లకి మోయండి, నేను బాబు పల్లకి మోస్తాను” అని క్లారిటీ ఇవ్వాలి.
ఈ రెండు క్లారిటీల్లో ఏదో ఒక విషయంపై అయోమయం తొలగించుకుని స్పష్టత ఇస్తే… అప్పుడు పవన్ ఎంచుకున్న ఏదో ఒక లక్ష్యం నెరవేరవచ్చు! అలాకానిపక్షంలో… మరికొన్ని సినిమాలకు సంతకాలు చేసుకుంటే బెటర్ అని సలహా ఇస్తున్నారు అభిమాన విశ్లేషకులు!