విజయవాడ వెస్ట్ టిడిపి ఎమ్మెల్యే జలీల్ ఖాన్ పవన్ కళ్యాణ్ పై తీవ్ర విమర్శలు గుప్పించారు. సోమవారం జనసేన కవాతు తర్వాత బహిరంగ సభలో ప్రసంగించిన పవన్ లోకేష్ ని ఉద్దేశ్నించి పలు విమర్శలు చేశారు. వారసత్వ రాజకీయాల గురించి పలు వ్యాఖ్యలు చేశారు. ఆయన చేసిన ఈ కామెంట్స్ పై జలీల్ స్పందించారు. ఆయన ఏమన్నారో కింద చదవండి.
సినిమాల్లో అవకాశాల లేక కొంతమంది రాజకీయాల్లోకి వచ్చి అవాస్తవాలు మాట్లాడుతున్నారు. ముఖ్యమంత్రి పైన, లోకేష్ పైన పవన్ కళ్యాణ్ అనవసైరమైన వ్యాఖ్యలు చేస్తున్నారు. సినీరంగంలో చిరంజీవి వారసత్వం పుచ్చుకుని ఎంతమంది నటిస్తున్నారో పవన్ కళ్యాణ్ చెప్పాలి అని డిమాండ్ చేశారు జలీల్ ఖాన్. మీరంతా ఆయన వారసత్వ నటులు కాదా? అంటూ ప్రశ్నించారు.
పవన్ కళ్యాణ్ రాజకీయాల్లో హుందాగా ప్రవర్తించాలి. అది చేస్తా, ఇది చేస్తా అంటే చూస్తూ ఉరుకోము. పుట్టిన ఊరిలో చిరంజీవి గెలవలేకపోయారు. ఓ మహిళ మీద చిత్తుగా ఓడిపోయారు. ఈ ఎన్నికల్లో పవన్ కళ్యాణ్ కు ఒక్క సీటు కూడా రాదు అంటూ స్పష్టం చేశారు. అవినీతి జరిగింది ప్రజారాజ్యం పార్టీలో, ఏపీలో కాదు. పవన్ ఎక్కువగా మాట్లాడితే, ఎక్కువుగా సీట్లు తగ్గిపోతాయి అంటూ హెచ్చరించారు జలీల్.
జగన్ కు దమ్ముంటే ఎంపిలను ముందే రాజీనామాలు చేయించేవారు. వచ్చే ఎన్నికల్లో వైసీపీ కి 30 సీట్లు మాత్రమే వస్తాయి అంటూ జోస్యం చెప్పారు. రాష్ట్రానికి చంద్రబాబు మాత్రమే ముఖ్యమంత్రి కావాలని ప్రజలు కోరుకుంటున్నారు అని వెల్లడించారు జలీల్ ఖాన్.