ఏపీ అసెంబ్లీలో అధికార పక్షం వైఖరితో విసిగిపోయిన వైసీపీ అధినేత జగన్ షాకింగ్ నిర్ణయం తీసుకున్నట్లు తెలుస్తోంది. అసెంబ్లీ బడ్జెట్ సమావేశాలకు హాజరైన జగన్, గవర్నర్ ప్రసంగం ముగిసేలోపే ఎమ్మెల్యేలు, ఎమ్మెల్సీలతో కలిసి సభ నుంచి వాకౌట్ చేశారు. తర్వాత తాడేపల్లిలోని పార్టీ కార్యాలయానికి వెళ్లిన ఆయన, కీలక నేతలతో చర్చించి, ఇకపై అసెంబ్లీకి వెళ్లకూడదనే నిర్ణయానికి వచ్చారు. ప్రతిపక్ష హోదా ఇవ్వకపోతే సభలో కూర్చోవడం వృథా అనిపించిందని జగన్ చెప్పినట్లు సమాచారం.
ఇప్పటికి జగన్ తన భవిష్యత్ కార్యాచరణను కూడా స్పష్టంగా తెలిపారు. మరో 30 ఏళ్ల పాటు రాజకీయాల్లో ఉంటానని, తనతో కష్టకాలంలో నిలబడే వారే నిజమైన అనుచరులని జగన్ అన్నారు. అసెంబ్లీలో తాము అడిగిన ప్రధాన ప్రతిపక్ష హోదా ఇవ్వకపోతే, ప్రజల మధ్యకే వెళ్లి పోరాటం చేస్తామని స్పష్టం చేశారు. 2028లో జమిలీ ఎన్నికలు జరుగుతాయని భావించి, అప్పటివరకు ప్రజల సమస్యలపై బయటే పోరాడుతామని పార్టీ నేతలకు సూచించినట్లు తెలుస్తోంది.
ఇదే సమయంలో జగన్ తీసుకున్న ఈ నిర్ణయం పలు అనుమానాలకు దారితీస్తోంది. మంత్రి అచ్చెన్నాయుడు, టీడీపీ నేత సోమిరెడ్డి చంద్రమోహన్ రెడ్డి ఇప్పటికే జగన్ అసెంబ్లీకి రావడం అనర్హత వేటు తప్పించుకునే ప్రయత్నమేనని వ్యాఖ్యానించారు. సోమవారం ఒక్కరోజు హాజరై వాకౌట్ చేయడం ద్వారా జగన్ ఆ అనుమానాలను మరింత బలపరిచినట్టే. అసెంబ్లీ వేదికగా ప్రభుత్వాన్ని నిలదీసే స్థానం ఉన్నప్పటికీ, దాన్ని వదిలేసి బయట పోరాటం చేయడమే సమాధానమా అనే ప్రశ్నలు తలెత్తుతున్నాయి.
అసలు ప్రతిపక్ష హోదా లేకుండా అసెంబ్లీలో ఉన్నత స్థాయిలో చర్చలలో పాల్గొనలేమా అనే అంశం చర్చనీయాంశమైంది. అసెంబ్లీలో తన హక్కులు లేవనే కారణంతో జగన్ దూరమవుతారా, లేక బయటే ప్రజల సమస్యలపై వేదికలు ఏర్పాటు చేసుకుంటారా అన్నది ఆసక్తిగా మారింది. టీడీపీ, జనసేన కూటమి సర్కార్ వైఖరితో విసిగిపోయిన జగన్, ప్రజా క్షేత్రంలో పోరాటం చేయడమే సమాధానం అని భావించినట్లు తెలుస్తోంది.
మొత్తంగా, వైసీపీ నేతలు ఇప్పుడు అసెంబ్లీ దూరం అవుతారా, లేక తమ నిరసన కొనసాగిస్తూ మళ్లీ తిరిగి సభలోకి వస్తారా అన్నది చూడాల్సిన విషయమే. కానీ, ప్రజా సమస్యలు చర్చించాల్సిన వేదిక అసెంబ్లీ అని భావించే ఓటర్లు, జగన్ ఈ నిర్ణయాన్ని ఎలా స్వీకరిస్తారన్నది ఆసక్తిగా మారింది. ఈ నేపథ్యంలో జగన్ రాజకీయ వ్యూహం ఏ దిశలో సాగుతుందో వేచిచూడాలి.
