ఇప్పుడు ప్రపంచ వ్యాప్తంగా అమెరికా – ఇరాన్ మధ్య ఉద్రిక్త పరిస్థితుల గురించే చర్చించుకుంటున్న సంగతి తెలిసిందే! ప్రధానంగా పశ్చిమాసియాలో ఉద్రిక్తత కారణంగా హార్మూజ్ జలసంధిలో రవాణాకు ఇబ్బందులు తలెత్తితే.. ఏయే దేశాలైతే కష్టాలు పడక తప్పదో ఆయా దేశాలైతే అక్కడి పరిస్థితిని నిశితంగా గమనిస్తున్నాయి. ఇక గల్ఫ్ దేశాల టెన్షన్ గురించి చెప్పే పనేలేదు. ఉరిమి ఉరిమి మంగళం మీద పడ్డట్లుగా ఉంది వాళ్ల పరిస్థితి.
మరోవైపు, ఇస్లామాబాద్ వేదికగా ఇరాన్, అమెరికా మధ్య జరిగిన శాంతి చర్చలు విఫలమైన నేపథ్యంలో.. అగ్రరాజ్యాధినేత రగిలిపోతున్నట్లు కనిపిస్తున్నారు.. భయపెట్టే ప్రకటనలు చేస్తున్నారు. ఇందులో భాగంగా… ఇరాన్ పోర్టుల వైపు వెళ్లి, వచ్చే అన్ని నౌకలను తమ నౌకాదళం అడ్డుకుంటుందని తెలిపారు. ఈ విషయంలో తగ్గేదే లేదంటూ హడావిడి చేస్తున్నారు. ఒక్కమాటలో చెప్పాలంటే హర్మూజ్ పై ఇది ట్రంప్ మార్కు రౌడీయిజం అన్నమాట!
కట్ చేస్తే… తాజాగా హర్మూజ్ జలసంధి నుంచి చైనాకు చెందిన ఓ నౌక సక్సెస్ ఫుల్ గా ప్రయాణించింది. సముద్ర ట్రాఫిక్ డేటా ప్రకారం… చైనాతో సంబంధం ఉన్న ఒక ట్యాంకర్ మంగళవారం హోర్ముజ్ జలసంధిని దాటింది. దీంతో… ఇరాన్ ఓడరేవులపై అమెరికా సైన్యం దిగ్బంధనం ప్రారంభించిన తర్వాత, ఈ కీలక మార్గం గుండా ప్రయాణించిన తొలి నౌకలలో ఇది ఒకటిగా నిలిచింది.
ఆ ట్యాంకర్ సుమారు 2,50,000 బ్యారెళ్ల మెథనాల్ ను తీసుకువెళుతోందని.. అది యూఏఈలోని హమ్రియా పోర్టులో ఈ సరుకును లోడ్ చేసినట్లు సదరు డేటా వెల్లడించింది. దీంతో… వెంటనే ఇరాన్ తనదైన వెటకారం మొదలుపెట్టింది. ఇందులో భాగంగా… ‘ట్రంప్ భయపడని’ దేశాలకు మాత్రమే ఈ దిగ్బంధనం వర్తిస్తుందని ఇరాన్ వ్యంగంగా స్పందించింది.
అక్కడితో ఇరాన్ వెటకారం మొదలవ్వలేదు. అంతకంటే ముందు ట్రంప్ బెదిరింపులకు దిగిన అనంతరం… అతన్ని ఎద్దేవా చేస్తూ ఏఐ చిత్రాలను రూపొందించింది. ఈ మేరకు దక్షిణాఫ్రికాలోని ఇరాన్ రాయబార కార్యాలయం సోషల్ మీడియాలో పోస్టులు పెట్టింది. దీనికి సంబంధించిన పిక్స్ ప్రస్తుతం నెట్టింట తెగ వైరల్ అవుతున్నాయి.
దక్షిణాఫ్రికాలోని ఇరాన్ రాయబార కార్యాలయం… ట్రంప్ ను సముద్రపు దొంగగా పోలుస్తూ ఓ ఏఐ చిత్రాన్ని పోస్ట్ చేసింది. ఇందులో అమెరికా ఉపాధ్యక్షుడు జేడీ వాన్స్, రక్షణ మంత్రి పీట్ హెగ్సెత్ లు కూడా ఉన్నారు. దీనికి ‘పర్షియన్ గల్ఫ్, హర్మూజ్ జలసంధికి చెందిన సముద్రపు దొంగలు’ అని క్యాప్షన్ ఇచ్చింది.
దీనితో పాటు 1980 నాటి ఓ మ్యూజిక్ వీడియోను కూడా పోస్టు చేసింది. అందులో ఏఐతో రూపొందించిన చిత్రంలో ట్రంప్ కీబోర్డ్ వాయిస్తూ ఉన్నారు. ‘నేను నిన్ను ఎప్పటికీ వదులుకోను.. హర్మూజ్ జలసంధిని మూసేయాలి.. నన్ను అడ్డుకుంటే.. నేను నిన్ను అడ్డుకుంటా’ అని అధ్యక్షుడు పాట పాడుతున్నట్లుగా ఉంది.
దీంతో… ఓ పక్క యుద్ధం అని, తన మాటే శాసనం అని, ఇరాన్ తన మాట వినని పక్షంలో అంతకు మించిన దడులు ఉంటాయని హెచ్చరిస్తుంటే.. ఇరాన్ మాత్రం ఇలా ట్రంప్ ని ఎద్దేవా చేస్తూ తనదైన వెటకారాన్ని ప్రదర్శిస్తుంది.
ఈ సోషల్ మీడియా పోస్టుల సంగతి కాసేపు పక్కనపెడితే… మూర్ఖంగా ట్రంప్, లెక్కలేనితనంగా ఇరాన్ అన్నట్లుగా సాగుతుందని చెబుతోన్న ఈ వ్యవహారంలో.. పశ్చిమాసియాతో పాటు తూర్పు ఆసియా గల్ఫ్ దేశాలు మాత్రం ఉక్కిరి బిక్కిరి అయిపోతున్నాయి.