అమెరికా, ఇరాన్ మధ్య జరుగుతున్న యుద్ధానికి సంబంధించిన శాంతి చర్చలు ఎవరూ ఊహించని రీతిలో అన్నట్లుగా పాకిస్థాన్ లో జరుగుతున్న సంగతి తెలిసిందే. దీంతో ప్రస్తుతం ఇస్లామాబాద్ పూర్తిగా రెడ్ జోన్ లోకి వెళ్లిపోయింది. సుమారు పది వేలకు పైగా భద్రతా సిబ్బంది ఇస్లామాబాద్ లో పాగా వేసిన పరిస్థితి. ఈ నేపథ్యంలో అటు ఇరాన్ ప్రతినిధులు, ఇటు అమెరికా ప్రతినిధిగా వైఎస్ ప్రెసిడెంట్ జేడీ వాన్స్ ఇస్లామాబాద్ కు చేరుకున్నారు.
ఈ క్రమంలో… అటు ఇరాన్ ప్రతినిధులను, ఇటు అమెరికా ప్రతినిధులను రిసీవ్ చేసుకునే సమయంలో పాక్ ఆర్మీ చీఫ్ ఆసిమ్ మునీర్ ధరించిన దుస్తులపై ఇప్పుడు చర్చ మొదలైంది. ఈ చర్చల ఘటనతో అటు పాక్ లోనూ ఇటు ప్రపంచంలోనూ తనను తాను పాక్ కి ఏకైక నేతగా చూపించుకునే ప్రయత్నం మునీర్ షురూ చేశారని అంటున్నారు.
ఏమాటకామాట చెప్పుకోవాలంటే… పాకిస్థాన్ లో ప్రజాస్వామ్య ప్రభుత్వాలు ఏనాడో రబ్బరు స్టాంపులుగా మారిపోయిన సంగతి తెలిసిందే. అక్కడ అంతా ఆర్మీ కనుసన్నల్లోనే నడుస్తుంటుంది. ఇక మునీర్ గురించి చెప్పే పనేలేదు. తనను తాను పాక్ కి అనధికారిక రాజ్యాధినేతగా ఆయన నిత్యం పరోక్షంగా చెప్పుకునే పనిలో బిజీగా ఉంటున్నారు.
ఈ క్రమంలో తాజాగా అటు ఇరాన్, ఇటు అమెరికా ప్రతినిధులు ఇస్లామాబాద్ లో అడుగుపెట్టిన వేళ.. ఆయన రెండు రకాల దుస్తులు ధరించి.. అటు పాక్ ప్రజానికానికి, ఇటు ప్రపంచ దేశాలకు మూడు రకాల సందేశాలు ఇచ్చే ప్రయత్నం చేశారనే చర్చ తాజాగా మొదలైంది. ఆ కథాకమీషు ఏమిటనేది ఇప్పుడు చూద్దామ్…!
ఇరాన్ పార్లమెంట్ స్పీకర్ మొహమ్మద్ ఘాలిబాఫ్, ఆ దేశ విదేశాంగ మంత్రి అబ్బాస్ అరఘ్చీ నేతృత్వంలోని ఇరాన్ ప్రతినిధి బృందానికి స్వాగతం పలుకుతున్నప్పుడు మునీర్ యుద్ధ దుస్తులలో కనిపించారు. అయితే… మరికొన్ని గంటల తర్వాత నూర్ ఖాన్ వైమానిక స్థావరానికి అమెరికా వైస్ ప్రెసిడెంట్ జేడీ వాన్స్ చేరుకున్నప్పుడు మునీర్ ఆర్మీ దుస్తులను పక్కనపెట్టి.. పూర్తి సూటు, బూట్లతో ఉన్నారు.
ఈ దృశ్యాలే భౌగోళిక, రాజకీయ పరిశీలకులలో ఆసక్తిని రేకెత్తించాయి. ఇది ఇరాన్, అమెరికాతో పాటు పాక్ ప్రజలు లక్ష్యంగా చేసుకుని ఉద్దేశపూర్వకంగా పంపిన సందేశమని పలువురు నిపుణులు అభిప్రాయపడుతున్నారు.
సాధారణంగా విదేశీ నాయకులను కలిసేటప్పుడు ఒక దేశ సైనికాధికారి ఎల్లప్పుడూ ఆర్మీ యూనిఫాంలో ఉండాలి. అయితే… ఇరాన్ తో సమావేశమైనప్పుడు మునీర్ యుద్ధ దుస్తులను ఎంచుకోవడం ఒక ఉద్దేశపూర్వక సందేశాన్ని పంపడానికేనని రక్షణ నిపుణులు నొక్కి చెబుతున్నారు.
క్షిపణి దాడులు, సరిహద్దు ఘర్షణలతో సహా ఇరాన్, పాకిస్తాన్ ల మధ్య ఇటీవలి ఉద్రిక్తతలను వారు ప్రస్తావించారు. తాను ఒక సైనిక నాయకుడిగా ఇరాన్ తో చర్చలకు వెళ్తున్నానని, ఆ దేశం పట్ల తన బలాన్ని ప్రదర్శించడానికే అలాంటి దుస్తులు ధరించారని చెబుతున్నారు.
మరోవైపు… జేడీ వాన్స్ కు స్వాగతం పలికే విషయంలో సూట్ ధరించిన మునీర్.. కేవలం వందనం చేసి పక్కకు తప్పుకునే సైనిక నాయకుడిగా కాకుండా, ఒక దౌత్యవేత్తగా తనను తాను ప్రదర్శించుకున్నారు. ఈ ప్రవర్తన మునీర్ కు రాజకీయ ఆశయాలు ఉన్నాయని స్పష్టంగా తెలియజేస్తున్నాయని అంటున్నారు.
ఆ రెండు సందేశాలతో పాటు స్వదేశంలోని పాకిస్తానీయులకు తెలియజేయాలనుకున్న మూడవ సందేశం కూడా తాజా ప్రవర్తనలో ఉందని అంటున్నారు పరిశీలకులు. అదేమిటంటే.. తాను అధికార కేంద్రంలో స్థిరంగా ఉన్నానని చెప్పడమే అని చెబుతున్నారు.
వాస్తవానికి పాకిస్తాన్ లో ప్రజాస్వామ్యబద్ధంగా ఎన్నికైన ప్రభుత్వం ఉన్నందున… నిబంధనల ప్రకారం మునీర్ స్థానంలో రాష్ట్రపతి, ప్రధానమంత్రి లేదా విదేశాంగ మంత్రి ఉండాలి. అంతే తప్ప ఇలా సైన్యాధిపతి హోదాలో ఉన్న వ్యక్తి అందరిపై అధికారం చెలాయించ కూడదు!
ఇవన్నీ తెలిసి కూడా మునీర్ ఈ స్థాయిలో తనను తాను ప్రపంచం ముందు పాకిస్థాన్ కు అన్నీ తానే అని నిరూపించుకునే ప్రయత్నం చేయడంతో… ఉత్తర కొరియాకు కిమ్ ఎలాగో, భవిష్యత్తులో పాకిస్థాన్ కు తాను అలాగే అని చెప్పకనే చెప్పినట్లయ్యిందని అంటున్నారు పరిశీలకులు.