ఆంధ్రప్రదేశ్‌లో వైసీపీ హయాంలో చోటుచేసుకున్న లిక్కర్ స్కాంలో మరో కీలక మలుపు తిరిగింది. గతంలో అధికారంలో ఉన్నపుడే వ్యవస్థను దుర్వినియోగం చేశారని ఆరోపణలు ఎదుర్కొంటున్న మాజీ ఐఏఎస్ అధికారి ధనుంజయ్ రెడ్డి, మాజీ ఓఎస్డీ కృష్ణమోహన్ రెడ్డిని శుక్రవారం రాత్రి స్పెషల్ ఇన్వెస్టిగేషన్ టీం (సిట్) అరెస్ట్ చేసింది. ఈ అరెస్టులతో విజయవాడ నగరంలో ఒకసారి ఉద్రిక్తత పరిస్థితులు నెలకొనగా, పోలీసులు అప్రమత్తమై నిఘా పెంచారు. అధికారిక సమాచారం ప్రకారం, కుటుంబ సభ్యులకు ముందుగానే అరెస్టు సమాచారం అందించగా, శనివారం నాటికి ఇద్దరినీ కోర్టు ముందు హాజరు పరచనున్నారు.
ఈ కేసు పుట్టిన విధానం చూస్తే, మద్యం పాలసీలో మార్పులు చేయడం ద్వారా వేల కోట్ల రూపాయలను ముడుపులుగా ఆర్జించారనే ఆరోపణలు ముఖ్యాంశంగా ఉన్నాయి. కూటమి ప్రభుత్వం ఏర్పడ్డ వెంటనే వీటిపై విచారణ చేపట్టేందుకు ప్రత్యేక బృందాన్ని నియమించగా, ఇప్పటికే కసిరెడ్డి రాజశేఖర్ రెడ్డిని అరెస్ట్ చేసి విచారించారు. ఆయ‌న ఇచ్చిన వివరాలతో ధనుంజయ్, కృష్ణమోహన్, గోవిందప్ప బాలాజీపై దృష్టి పెట్టారు. ప్రాథమికంగా అందిన ఆధారాలు వీరిపై ఉన్న అనుమానాలను బలపరిచాయని అధికారులు చెబుతున్నారు.
సుప్రీంకోర్టులో బెయిల్ కోసం వేసిన పిటిషన్లు తిరస్కరించడంతో, త‌మకు ఇంకా సురక్షితంగా ఉండే మార్గం లేదని గ్రహించిన వీరిని సిట్ చివరకు అరెస్ట్ చేసింది. మద్యం వ్యాపారంలో ప్రణాళికాబద్ధంగా జరిగిన అక్రమాలకు సంబంధించి అరెస్టుల సంఖ్య పెరుగుతుండటంతో ఈ వ్యవహారం ఇంకా ఎన్ని కీలక నాయకులను లేదా అధికారులను తాకుతుందో అన్న ఉత్కంఠ నెలకొంది. రాజకీయంగా ఈ అరెస్టులు కొత్త చర్చకు దారితీయగా, వైసీపీ హయాంలో జరిగిన పాలనా వైఫల్యాలపై నిదర్శనంగా ఇది నిలుస్తుందని అధికార వర్గాలు భావిస్తున్నాయి.