ఆంధ్రప్రదేశ్: తాజాగా వైస్సార్సీపీ మంత్రి కొడాలి నాని చేసిన వ్యాఖ్యలు రాజకీయ వర్గాల్లో సంచలనం అయ్యాయి. దేవినేని ఉమాని కొడతా అంటూ ఆయన చేసిన వ్యాఖ్యలపై టీడీపీ నేతలు మండిపడుతున్నారు. దేవినేని ఉమాను పోలీసులు అదుపులోకి తీసుకోవడం సంచలనంగా మారింది. ఇక ఇదిలా ఉంటే… తాజాగా టీడీపీ రాష్ట్ర అధ్యక్షులు కింజరాపు అచ్చెన్నాయుడు తాజాగా మీడియాతో మాట్లాడుతూ కీలక వ్యాఖ్యలు చేసారు. బూతుల మంత్రిని రాష్ట్రంపై ఊరి మీద ఆంబోతులా జగన్ రెడ్డి వదిలేశారు అని ఆయన ఆరోపణలు చేసారు. దేవినేని ఉమామహేశ్వరరావును పోలీసులు ఆదీనంలోకి తీసుకోవడాన్ని తీవ్రంగా ఖండిస్తున్నాం అని ఆయన మండిపడ్డారు. నిరసన తెలిపే హక్కు ప్రజాస్వామ్యంలో లేదా? అని నిలదీశారు.
కొడాలి నాని వాగుడు రోగం చివరి దశకు చేరింది అని అన్నారు. ఇష్టాను సారంగా ఎవరినిపడితే వాళ్లను మాట్లాడుతున్నారు అని తీవ్ర వ్యాఖ్యలు చేసారు. అనుచిత వ్యాఖ్యలు చేసిన నానిని తక్షణమే అరెస్టు చేయాలి అని డిమాండ్ చేసారు. శాంతియుతంగా ఎన్టీఆర్ విగ్రహం వద్ద దీక్ష చేస్తానన్న దేవినేని ఉమని పోలీసులు ఎందుకు ఆధీనంలోకి తీసుకున్నారు? అని నిలదీశారు. జనం ముందుకు నాని వస్తే మొహం మీద కాండ్రించి ఉమ్మేస్తారు అని అన్నారు. అభివృద్ధి మీద చర్చకు రమ్మంటే వ్యక్తిగత విమర్శలు చేయడం సిగ్గుచేటు అని మండిపడ్డారు. గుడివాడ ప్రజల సమస్యలు పక్కన పెట్టి పక్క నియోజకవర్గాల్లో వేలు పెడుతున్నారు అని ఆరోపణలు చేసారు. ప్రభుత్వం మీద ప్రజలలో పెరుగుతున్న నిరసనని పక్కదోవ పట్టించేందుకే ఇలా చేస్తున్నారని ఆయన విమర్శించారు.