Raghurama Krishna Raju: సస్పెన్షన్లో ఉన్న సీనియర్ ఐపీఎస్ అధికారి పీవీ సునీల్ కుమార్పై ఏపీ శాసనసభ డిప్యూటీ స్పీకర్ రఘురామ కృష్ణమరాజు సోమవారం కేంద్రానికి ఫిర్యాదు చేశారు. ఈ మేరకు ఆయన డిపార్ట్మెంట్ ఆఫ్ పర్సనల్ అండ్ ట్రైనింగ్ (DoPT) కార్యదర్శికి లేఖ రాశారు. సునీల్ కుమార్ ఇటీవల చేసిన వ్యాఖ్యలు ఆల్ ఇండియా సర్వీస్ (AIS) నిబంధనలకు విరుద్ధంగా ఉన్నాయని, ఆయనపై కఠిన చర్యలు తీసుకోవాలని రఘురామ ఆ లేఖలో కోరారు.
పీవీ సునీల్ కుమార్ వ్యాఖ్యలపై కేంద్రానికి రఘురామ ఫిర్యాదు. కులాల ప్రస్తావన, రాజకీయ వ్యాఖ్యలు సర్వీస్ రూల్స్కు విరుద్ధమని స్పష్టీకరణ. వెంటనే సర్వీస్ నుంచి డిస్మిస్ చేయాలని డిమాండ్.
సస్పెన్షన్లో ఉన్నప్పటికీ ఓ బాధ్యతాయుతమైన ఐపీఎస్ అధికారిగా ఉండి కులాలను రెచ్చగొట్టేలా, రాజకీయ రంగు పులుముకున్న వ్యాఖ్యలు చేయడంపై రఘురామ కృష్ణమరాజు తీవ్ర అభ్యంతరం వ్యక్తం చేశారు. కాపులు, దళితులు ఏకమైతే రాజ్యాధికారం సాధ్యమని, కాపులు సీఎంగా, దళితులు డిప్యూటీ సీఎంగా ఉండవచ్చని సునీల్ కుమార్ ఇటీవల వ్యాఖ్యానించిన విషయం తెలిసిందే. ఈ వ్యాఖ్యలను రఘురామ తన లేఖలో ప్రధానంగా ప్రస్తావించారు.
సునీల్ కుమార్ వ్యాఖ్యలు అఖిల భారత సర్వీసు నిబంధనల (All India Service Rules) స్పష్టమైన ఉల్లంఘన అని రఘురామ పేర్కొన్నారు. ఒక అధికారి సస్పెన్షన్లో ఉన్నప్పటికీ, సర్వీస్ రూల్స్ ఆయనకు వర్తిస్తాయని గుర్తుచేశారు. రాజ్యాంగ స్ఫూర్తికి విరుద్ధంగా, రాజకీయంగా కులాలను రెచ్చగొట్టేలా వ్యవహరించడం సరికాదని ఆయన మండిపడ్డారు.
రాజకీయ దురుద్దేశంతో కూడిన వ్యాఖ్యలు చేసిన పీవీ సునీల్ కుమార్ను వెంటనే సర్వీస్ నుంచి తొలగించాలని (Dismissal) రఘురామ కృష్ణమరాజు డీవోపీటీని డిమాండ్ చేశారు. ఈ వ్యవహారాన్ని తీవ్రంగా పరిగణించి తక్షణమే చర్యలు తీసుకోవాలని ఆయన కోరారు.
