Chandrababu: తిరుపతిలో జరిగిన తొక్కిసలాట ఘటన రాష్ట్రవ్యాప్తంగా తీవ్ర ఆందోళనలను కలిగించింది. ప్రమాదంలో ఆరుగురు భక్తులు ప్రాణాలు కోల్పోవడంతో ప్రభుత్వ యంత్రాంగంపై విమర్శలు వెల్లువెత్తాయి. ఈ నేపథ్యంలో ఆంధ్రప్రదేశ్ ముఖ్యమంత్రి చంద్రబాబు నాయుడు ప్రమాద స్థలాన్ని పరిశీలించి, పరిస్థితిని సమీక్షించారు. తిరుపతిలోని బైరాగిపట్టెడ వద్ద జరిగిన ఘటనపై వివరణ కోరుతూ టీటీడీ, పోలీస్ అధికారులు, జిల్లా కలెక్టర్‌పై ఆగ్రహం వ్యక్తం చేశారు.
ముఖ్యమంత్రి వెంట పలువురు మంత్రులు, టీటీడీ ఛైర్మన్ ఉన్నారు. ప్రమాదానికి గల కారణాలను అడిగి తెలుసుకున్న చంద్రబాబు, భక్తుల రద్దీని నిర్వహించడంలో టీటీడీ విఫలమైందని తీవ్రంగా వ్యాఖ్యానించారు. హ్యూమన్ సైకాలజీ ఎలా ఉంటుందో తెలియదా? 2,000 మందికి మాత్రమే అనుమతించాల్సిన ప్రదేశంలో 2,500 మందిని ఎలా అనుమతించారు? అంటూ అధికారులను ప్రశ్నించారు. టికెట్ పంపిణీ సరిగా నిర్వహించకపోవడం వల్లే తొక్కిసలాట జరిగిందని చెప్పారు. అంబులెన్స్ ఆలస్యంగా రావడంపై కూడా సీరియస్‌గా స్పందించారు.
ముఖ్యమంత్రి, భవిష్యత్తులో ఇలాంటి ఘటనలు జరగకుండా ముందస్తు చర్యలు తీసుకోవాలని అధికారులను ఆదేశించారు. హ్యూమన్ సైకాలజీ గురించి తెలుసుకుని, భక్తుల రద్దీని సక్రమంగా నిర్వహించేలా ప్రత్యేక ప్రణాళిక రూపొందించాలన్నారు. అదనపు భద్రత చర్యలతో పాటు టికెట్ పంపిణీకి మెరుగైన పద్ధతులు అవలంబించాల్సిన అవసరం ఉందని తెలిపారు. భక్తుల విశ్వాసాన్ని కోల్పోవద్దని స్పష్టం చేశారు.
ఈ ఘటనపై రాష్ట్రవ్యాప్తంగా చర్చ జరుగుతోంది. భక్తులు సురక్షితంగా దర్శనం చేయటానికి అవసరమైన ఏర్పాట్లలో ప్రభుత్వం శ్రద్ధ చూపాలని ప్రజలు కోరుతున్నారు. ఎలాంటి తప్పిదాలకు తావులేకుండా భద్రతా ప్రణాళికలు అమలు చేయాలంటూ నిపుణులు సూచిస్తున్నారు.
